Саха тыйаатырыгар – Бүөтүр Тобуруокап алгыһа

Бөлөххө киир:

Бэҕэһээ, алтынньы 25 күнүгэр, саха норуодунай бэйиэтэ Бүөтүр Тобуруокап төрөөбүтэ 100 сылыгар аналлаах мунньах П.Ойуунускай аатынан Саха тыйаатырыгар үөрүүлээх быһыыга-майгыга буолла.

Бу иннинэ тыйаатыр фойетыгар «Тобуруо оһуохайыгар» дьон астына оһуохайдаата.

Саха норуотун тапталлаах бэйиэтэ оруобуна төрөөбүт күнүгэр буолбут улахан тэрээһиҥҥэ тыйаатырга тобус-толору киһи муһунна. Хас биирдии ыалдьыкка Бүөтүр Тобуруокап оҕолорго аналлаах альбом-кинигэтин, «Чолбон» 10-с нүөмэрин, «Дьол уонна сор» поэма уһуллубут компакт-диискэтин бэлэх ууннулар.

Сүрүн дакылааты СӨ култуураҕа миниистирэ Владимир Тихонов оҥордо. Ону сэргэ, СӨ Судаарыстыбаннай Мунньаҕын (Ил Түмэн) наукаҕа, үөрэхтээһиҥҥэ, култуураҕа, сонуну киэҥник тарҕатар сириэстибэлэргэ уонна уопсастыбаннай дьыалаларга кэмитиэтин бэрэссэдээтэлэ Антонина Григорьева, бэйиэт бииргэ төрөөбүт кыра быраата Николай Тобуруокап, Саха сирин Суруйааччыларын сойууһун бэрэссэдээтэлэ Наталья Харлампьева, СӨ Суруйааччыларын сойууһун бэрэссэдээтэлэ Иван Мигалкин, «Саха сирин суруйааччылара» ассоциация бэрэссэдээтэлэ Олег Сидоров, Үөһээ Бүлүү улууһун дьокутааттарын сэбиэтин бэрэссэдээтэлэ Семен Михалев, Нам с. баһылыга Александр Кардашевскай иһирэхтик аҕыннылар.

Бүөтүр Тобуруокап сырдык аатын үйэтитиигэ тус кылааттарын иһин анал өйдөбүнньүк бэлиэнэн П.Ойуунускай аатынан Саха тыйаатырын артыыстара Зоя Багынанова, Мария Николаева, Кирилл Семенов, суруйааччылар Наталья Михалева-Сайа, Константин Сосин, Михаил Санников наҕарааадаланнылар.

Бу күн Үөһээ Бүлүү улууһун бочуоттаах олохтооҕун үрдүк аатын сүкпүт филологическай наука доктора, ХИФУ профессора Николай Тобуруокап ханна да улаханнык кэпсэнэ, сурулла илик сэһэргээһинэ дьон болҕомтотун тарта. Кини чуолаан сэттэ оҕолоох дьиэ кэргэҥҥэ Бүөтүр Тобуруокап убай киһи быһыытынан улахан суолтатын бэлиэтээтэ.

«Мин бэйиэт-убайым айымньыларын, соһуйуоххут иһин, хаһан да ырыппатаҕым. Учуонай үрдүк аатын ылан, син баараҕадыйдым дуу дии санаан: «Эн айымньыларгын, айар үлэҥ туһунан элбэҕи суруйдулар даҕаны, мин саныырбын ситэ этимээри гыннылар ээ. Мин холонобун дуо?»диэбитим. Онуоха: «Суох. Син биир убайа буолан хайҕыыр диэхтэрэ», – диэн аккаастаан кэбиспитэ.

Бу күннэргэ убайым үбүлүөйдээх сааһын Саха сирин элбэх сиригэр бэлиэтээбиттэриттэн олус үөрдүм уонна долгуйдум. Саха норуота бу күннэргэ ыытыллыбыт тэрээһиннэргэ, ырытыыларга, бэлиэтээһиннэргэ тардыһыыта мин күүппэтэх өттүбүттэн буолла. Маны барытын истэн-көрөн, олус долгуйдум», – диэн эттэ.

Кырдьыга да, Тобуруокаптар улахан оҕолоро Бүөтүр холобурун батыһан, сэттэ оҕоттон 5 оҕо Бүлүүтээҕи педагогическай училищеҕа үөрэнэн учуутал идэтин ылбыта элбэҕи этэр.

Наталья Харлампьева бэйэтин ахтыытыгар кини Бүөтүр Тобуруокаптыын олоҕор биирдэ алтыспытын, подстрочник тылбааһы оҥорууга, сахалыыттан нууччалыыга тылбааска ардыгар дьиҥ сахалыы тыын сүтэрин уо.д.а. тылбаас кистэлэҥнэриттэн сөптөөх сүбэлэри биэрбитин махталынан аҕынна. Иван Мигалкин Бүөтүр Тобуруокап кэргэнинээн Евгения Васильевналыын Москваҕа бииргэ үөрэммит-үлэлээбит кэмнэрин ахтан-санаан ылла, кинилэргэ анаан бу күннэргэ суруйбут  хоһооннорун ааҕан иһитиннэрдэ.

Семен Михалев уонна Александр Кардашевскай биир дойдулаахтарын, улуукан учууталларын туһунан ахтыыларыгар Бүөтүр Николаевичтыын алтыспыттарын дьоллооҕунан ааҕыналларын билиннилэр. Маннык улахан тэрээһини киин куоракка бүтүн нэдиэлэни быһа ыытары өйөөбүттэригэр уонна көҕүлээбиттэригэр махтаннылар. Бүөтүр Тобуруокап 100 сыллаах үбүлүөйэ төрөөбүт улууһугар сэтинньи ый саҥатыгар бэлиэтэнэрэ былааннанарын туһунан иһитиннэриилэрин көрөөччүлэр ытыс тыаһынан ылыннылар.

Үөрүүлээх мунньах иккис чааһыгар П.А.Ойуунускай аатынан Саха уонна Үүнэр көлүөнэ тыйаатырын артыыстара кыттыылаах «Поэт алгыһа» уус-уран дьүһүйүүнэн түмүктэннэ.

Надежда ЕГОРОВА, «Саха сирэ» хаһыат, edersaas.ru 

+1
0
+1
0
+1
0
+1
0
+1
0
+1
0
+1
0