Саха политехническай лиссиэйгэ – “Күһүн бэлэхтэрэ” дьаарбаҥка
Аҕыйах хонуктааҕыта батсаабынан Сэбиэскэй cойуус пионердара аныгы кэмҥэ илэ бэйэлэринэн олорор хаартыскаларын тутан, сонургуу көрдүм. Туоһулаһан билбитим, Дьокуускайдааҕы политехническай лиссиэй үөрэнээччилэрэ эбит.edersaas.ru
Ол курдук, ааспыт субуотаҕа саха политехническай лиссиэйгэ “Күһүн бэлэхтэрэ” диэн сыллата ыытыллар аһымал дьаарбаҥка буолан ааспыт. Тэрээһиҥҥэ оҕолор, төрөппүттэр оҕуруот, бурдук, эт ас арааһын астаан, кэнсиэрбэлээн атыылаабыттар. Киллэрбит харчыларын сороҕун кылаас фондатыгар хааллараллар, ордугун оскуола уустук балаһыанньаҕа түбэспит оҕолорго оҥорор социальнай көмөтүгэр биэрэллэр эбит. Тэрээһиҥҥэ ким баҕалаах барыта кыттар. Онон ким төһөнү биэрэрэ, төһөнү атыылыыра — бэйэтин бырааба.
“Дьаарбаҥка сүрүн сыалынын — оҕону аһыныгас сыһыаҥҥа, аһыныгас санааҕа иитии. Биһиги оскуолабытыгар итинник тэрээһин ыытыллыбыта сүүрбэччэ сыл буолла. Дьаарбаҥкаҕа киирбит харчыттан дьиэлэрэ умайбыт дьиэ кэргэҥҥэ 5 тыһ. солк., инбэлиит оҕоҕо 3 тыһ. солк. харчынан көмөлөстүбүт. Ааспыт үөрэх дьылын устата ити курдук уустук балаһыанньалаах 14 дьиэ кэргэн оҕотугар көмө оҥорбуппут. Быйыл оҕолор, төрөппүттэр тэрээһини биһирээтилэр. Аҥардас атыы-кутуу эрэ буолбакка, кэнсиэрдээх, “көҥүл микрофоннаах” ааста. Кылаастар тус-туспа таҥнан-симэнэн кэлбиттэрэ. Ол курдук, холобура, кимнээх эрэ сахалыы таҥныбыттара, атыттар пионер буолбуттара, баартыктаах, араас атрибутикалаах кылаастар элбэхтэрэ. Дьаарбаҥка түмүгүнэн анал номинациялары олохтоон туттардыбыт”, — диэн дириэктэри иитэр үлэҕэ солбуйааччы Елизавета Николаева кэпсиир.
Сэбиэскэй cойуус “пионердара” буолбут 4-с “А” кылаас салайааччыта Саргылана Скрябина:
— Биһиги кылаас кыһыл таҥаһынан көннөрү хаалтыс бааныахпыт дии санаабытым. Тиийбитим, оҕолорум дьиҥнээх хаалтыһы иилинэн тураллар, букатын, оччотооҕу пионердыы кэриэтэ таҥныбыттар. Төрөппүттэр горн, барабан булбуттар, эбиитин бары пилоткалаахтар. Оҕо сааһым хаалтыһын көрөн олус үөрдүм! Бүтүн Сайсары уокуругун тэрээһинин курдук ааста. Киирбит 11 тыһ. солк. оҕолор уонна төрөппүттэр быһаарыыларынан кылаас фондатыгар, оскуолаҕа хаалла. Уустук балаһыанньаҕа түбэспит оҕолорго көмөлөһөбүт уонна сыл устата ыытыллар араас тэрээһиннэргэ, бириискэ туттабыт. Онон эбии харчы хомуйарбыт да ахсааннаах. Толоругас, эппиэтинэстээх үөрэнээччилэрдээхпиттэн, тэрээһиннээх төрөппүттэрдээхпиттэн үөрэбин.
Людмила ПОПОВА, “Саха сирэ” хаһыат, edersaas.ru