Саха сиригэр ойуур баһаардара арыый намыраан эрэллэр. Өскөтүн, бэҕэһээ эрэ өрөспүүбүлүкэҕэ сүүстэн тахса ойуур баһаара баара бэлиэтэммит буоллаҕына, бүгүн — 86.
Биир хонук иһигэр уоту утары охсуһааччылар 20 баһаары умуруордулар. Чугастааҕы күннэргэ балаһыанньа өссө көнүө диэн этэр СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников. Кини маныаха күн-дьыл туруга, күүстээх ардахтар уонна ойуур баһаарын утары охсуһааччылар сыралаах үлэлэрэ сабыдыаллааҕын ыйар. Ойуур баһаардарын умулларыыга 1 146 киһи үлэлии сылдьар. Ол иһигэр, 709 парашютнай-десантнай баһаарынай сулууспа, 217 ойуур баһаарын утары охсуһар сулууспа, 68 ГПС уонна МЧС үлэһиттэрэ, олохтоох нэһилиэнньэттэн бэйэлэрин баҕа өттүлэринэн 152 көмөлөһөөччү, 110 тиэхиньикэ үлэлииллэр.
— Өрөспүүбүлүкэ сиригэр-уотугар баһаары утары орхсуһааччылар сыраларынан, күүстээх ардахтар түһүүлэринэн биллэр түмүктэр бааллар. Аны, өссө икки-үс күн устатыгар биһиги баһаары биллэ аҕыйатыахпытын наада , — диир кини.
Билигин бэлиэтэнэр баһаардартан алта ойуур баһаара уонна биир ландшафтнай баһаар бохсуллубуттар. Чугастааҕы кэмнэргэ баһаардары эбии бохсор уонна умулларар сорук турар. Кэнники биэс хонукка кэҥээбэккэ турар ойуур баһаардара умулларыллыахтара.
КЧС мунньаҕар Садовников улуустар балаһыанньаларын билистэ. Ордук улахан болҕомто элбэх ойуур баһаара бэлиэтэнэр соҕуруу сытар оройуоннарыгар уурулунна. Дьокуускайтан Уус Маайа оройуонугар ойуур баһаарын умулларыыга сүрүннээччини ыытыы боппуруоһа эмиэ көрүллэр.
Нэһилиэнньэлээх пууннартан ырааҕа суох баар ойуур баһаардарыгар тохтоотоххо, Орто Халыма оройуонугар Налимскайга балаһыанньа арыый тупсубут. Бу үлэни сөптөөхтүк сүрүннээһинтэн буолара ыйылынна. Уот хаппыт уопсай иэнэ 23 759 га. Кэнники хонукка тэнийии, кэҥээһин бэлиэтэммэтэх. Уоту утары 46 киһи, 6 тиэхиньикэ үлэлиир.
Мииринэй оройуонугар Арыылаахха, өрөспүүбүлүкэтээҕи Авиалесоохрана салайааччыта Владимир Леонов иһитиннэрэринэн, балаһыанньа көнөн эрэр. Уот сиэбит уопсай иэнэ 1780 га. Ойуур баһаарын умулларыыга 189 киһи, 20 көлө үлэлиир. Аны 4 км хастахтарына, уоту тула эргийэллэр. Бэҕэһээ Бе-200 көтөр аал 12 төгүл быраҕыытынан, 108 туонна уу кутуллубут.
Садовников Үөһээ Бүлүү уонна Ньурба оройуоннарыгар ойуур баһаардарын утары үлэни күүһүрдэргэ соруйда. Атын улуустарга ойуур баһаардарын умуруорууга үлэлээччилэри көрөн, манна күүһү эбэн биэриэхтэрэ.
Бэлиэтээн эттэххэ, сааскы кэмтэн өрөспүүбүлүкэ сиригэр-уотугар 504 ойуур баһаара бэлиэтэммит (уопсай иэнэ 401 972,11 га). Былырыын бу кэмҥэ уопсайа 4 359 442,77 га иэннээх сиринэн 1 328 ойуур баһаара бэлиэтэнэн турар.
Хаартыскаҕа Мария Васильева (СИА) түһэриитэ
