Анаабыр улууһун киин сэлиэнньэтигэр, Сааскылаахха, киинэ саалата арыллан үлэлээбитэ биир сыл буолбут. Онон сэбиэскэй былаас эстиэҕиттэн дьиэлэригэр бүгэн олорон тэлэбииһэр эрэ көрөр хоту дойду олохтоохторо үчүгэй хартыыналары көтүппэккэ көрөр дьолломмуттар. Дьиҥэр, бу саалаҕа кэнсиэр, мунньах, көрсүһүү барыта ыытыллар эбит.
Туоһулаһан билбитим – “Алмаас” диэн ааттаах норуот айымньытын дьиэтин улуустааҕы култуура управлениета бас билэр, дьаһайар уонна киинэ саалатын эмиэ кини тэрийбит. Саала 200 киһи биирдэ олорор миэстэлээх. Дьокуускай куорат улахан экраннарыгар тахсар киинэ ол күн көрдөрүллэр эбит. Уратыта диэн, сыаната чэпчэки. Арай, үчүгэйдик афишаламмыт, рекламаламмыт хартыына маҥнайгы күннэргэ 2,5 мөһөөххө тиийэр, онтон 2 мөһөөххө түһэр. Култууралар сыл иһигэр 1,5 мөл. солкуобайы киллэринэн, араас тэрээһин ороскуотугар туттубуттар.
«Алмаастан» сыыры таҥнары түстэххэ, улуус уонна нэһилиэк дьаһалталарын хонтуораларын аттыгар Сынньалаҥ киинин дьиэтин атахтара түһэриллэн, быйыл саас тутуу бөҕө саҕаламмыт. Саҥа эбийиэк эһиил үлэҕэ киллэриллиэхтээх дииллэр. Киинэ саалата ол кииҥҥэ көһөн киириэхтээх. Оччоҕуна киин сиртэн ыраах, тыйыс айылҕалаах Сааскылаах олохтоохторо ”үрүҥ дьон” курдук сынньаналларыгар өссө табыгастаах, тупсаҕай усулуобуйа олохтонуо.
Василий НИКИФОРОВ.