«Сахаэнерго» тэрилтэ Анаабыр улууһун Сааскылааҕар 1 МВт кыамталаах саҥа дизельнэй электростанцияны тутан үлэҕэ киллэрдэ.
edersaas.ru
Бу эбийиэк «Сахаэнерго» уонна «Анаабыр долган-эбэҥки национальнай улууһа» муниципальнай тэриллии холбоhуктаах бырайыактара. Саҥа электростанция үөрүүлээх аһыллыытыгар «Сахаэнерго» тэрилтэ толорооччу дириэктэрин солбуйааччы Гаврил Алексеев, улуус дьаһалтата, олохтоохтор кыттыыны ыллылар.
«Саҥа электростанция улууска бырамыысыланнас уонна оҥорон таһаарыы сайдыытыгар төһүү күүс буолуоҕа. Манна тирэҕирэн хоту олорор дьиэлэр, социальнай тутуулар сыыйа элбээн, дьэндэйэн иһиэхтэрэ» , — диэн Гаврил Алексеев бэлиэтээн эттэ. Энергетическэй эбийиэк икки блок-модултан турар. Ону «Сахаэнерго» оҥорон таһаарар киинин үлэһиттэрэ хомуйбуттар.
Электрическэй энергия ситимин саҥардаары, 2500 кВА кыамталаах эбии трансформаторы уонна дизельнэй электростанцияттан барар 5 км усталаах үрдүк күүрүүлээх уот ситимин туппуттар. «Сахаэнерго» тэрилтэ хотугу сирдэри сайыннарыы хайысхатынан өрөспүүбүлүкэ бырабыыталыстыбатын кытта ыкса үлэлэһэр. Энергетиктар олохтоох бэйэни салайыныы уорганнарын кытта киэҥ хабааннаахтык үлэлэһэргэ бэлэмнэрин биллэрэллэр уонна холбоһуктаах инвестиционнай бырайыактарга этиилэри күүтэллэр.
Саргылана Савватеева, edersaas.ru сайтка анаан