Анаабыр улууһун Сааскылааҕар ньиэп ыскылаатын уматыктаах цистерналара бүгүн 14.40 чааска умайан, чугас турар дьиэлэр олохтоохторун куттала суох сиргэ илдьэн эрэллэр.
edersaas.ru
ИДьМ пресс-сулууспата иһитиннэрбитинэн, 28 киһилээх, 4 тиэхиньикэлээх баһаарынай сулууспа уоту умуруорарга уонна аттынааҕы цистерналары сойутарга үлэлиир. Баһаар 100 кв.м. иэннээх сиргэ умайар.
Билигин 93 киһини эвакуациялаатылар. Дьокуускайтан аэромобильнай бөлөх көтөргө бэлэмнэнэр. Аллайыаха улууһун борокуруорун э.т. тиийиэхтээх. СӨ ыксаллаах балаһыанньаҕа хамыыһыйата суһаллык мунньахтаан, Айсен Николаев сорудаҕынан, быыһыыр сулууспаны ыытар буоллулар. Кутталлаах баһаары утары үлэни сүрүннүүргэ СӨ бырабыыталыстыбатын бэрэссэдээтэлин солбуйааччы Алексей Колодезников тиийиэҕэ.
Баһаар кэмигэр улахан иһиккэ 480 туонна газоконденсатнай уматык баара. Сабаҕалааһын быһыытынан, массыынаны саппараапкалыыр кэмҥэ элэктэриичистибэ статиката үөскээн, кыым саҕыллан, умайбыт буолуон сөп.
Ангелина Васильева, “Саха сирэ” хаһыат, edersaas.ru
Хаартыска: ИДьМ пресс-сулууспата.