Тыа хаһаайыстыбатын министиэристибэтэ сааскы халаан уутун хоромньута суох аһардар туһугар дьаһаллары эрдэттэн бэлэмниир.
edersaas.ru
Күнү-дьылы кэтээн көрөр сулууспа быйыл өрүстэр эрдэ эстэр туруктаахтарын сабаҕалыыр. Муус харыыта Өлүөнэ, Алдан, Амма уонна Халыма өрүстэргэ тахсыан, уу таһыма биир-икки миэтэрэҕэ тиийэ үрдүөн сөп диэн сэрэтэллэр.
Тыа хаһаайыстыбатын министиэристибэтигэр тэриллибит суһал штаб нэһилиэктэр коронавирустан сылтаан төһө да ыраахтан үлэлиир эрэсиимҥэ көһөрүлүннэр, халаан уута хоромньута суох ааһарын туһугар ирдэнэр үлэлэри тэрийэр. Ол курдук, нэһилиэктэр пааспардара, ууга барар кутталлаах эбийиэктэр испииһэктэрэ, сүөһүнү-сылгыны үөһэ, уу ылбат сиригэр таһаарыы былаана итиэннэ быстах хаайар пууннары көрүү-истии кыраапыга оҥоһулунна. Өрөспүүбүлүкэ үрдүнэн өрүстэр сүнньүлэригэр сытар 14 улуус 51 нэһилиэгэр халаан кэмигэр сүөһүнү-сылгыны таһааран, быстах хаайар 93 пуун баар. Муус устар 16 күнүнээҕи туругунан, 16 улуус 17 нэһилиэгэр 26 пуун туруга, аһылык саппааһынан хайдах хааччыллыбыта бэрэбиэркэлэммит, сэттэ улууска сүөһүнү-сылгыны үөһэ таһаарар эрчиллиилэр тэриллибиттэр, 210 (тыа хаһаайыстыбаларын управлениеларын, дьаһалталар исписэлиистэрэ, хаһаайыстыбалар салайааччылара) халааны утары дьаһаллары тэрийиигэ үөрэммиттэр. Сүөһүнү-сылгыны быстах хаайар пууннарга наада буолар от уонна бурдук саппааһа баар. Муус устар 30 күнүгэр диэри ону миэстэҕэ таһар уонна өрөмүөнү бүтэрэ иликтэр ситэрэллэрэ ирдэнэр.
“Сири мелиорациялааһын уонна тыа хаһаайыстыбатын уунан хааччыйыы управлениета” судаарыстыба бүддьүөтүн тэрилтэтин исписэлиистэрэ кулун тутар 12 күнүттэн саҕалаан 14 улуус дьаһалталарын уонна ыксаллаах быһыыга-майгыга хамыыһыйалар үлэһиттэрин кытары гидротехническэй тутуулар итиэннэ ууну халытан нүөлсүтэр ситимнэр халааны аһардарга төһө бэлэмнээхтэрин көрөллөр-истэллэр, буор таһаллар. Барыта 71 эбийиэги, ол иһигэр, 59 быһыты, 12 ууну халытан нүөлсүтэр ситими бэрэбиэркэлээбиттэр. Көмүөл ааһар кэмигэр дьуһуурустубаҕа 73 тиэхиньикэ (бульдозердар, погрузчиктар, самосваллар, экскаватордар, «МТЗ-82» тыраахтардар уо.д.а.) туруоруллуохтаах.
Ити курдук, суһар штаб тэрийиитинэн, халаан ылар кутталлаах сирдэриттэн сүөһүнү-сылгыны быстах хаайар пууннарга таһаарыы былаанын оҥорууга методкөмө оҥоһуллар, нэһилиэнньэҕэ өйдөтөр-сырдатар үлэ ыытыллар, сүөһүнү-сылгыны уонна тыа хаһаайыстыбатын эбийиэктэрин страховкалыырга тустаах хампаанньалары кытары дуогабар түһэрсэр үлэ ыытыллар, халаан хоромньутун докумуоннарын оҥорууга методическай сүбэлэр бэриллэллэр.
Раиса Сибирякова, «Саха сирэ» хаһыат edersaas.ru