“Сааскы куһу көҥүллүүллэр дуу, боболлор дуу?” диэн билигин үгүс киһи ыйытар буолуохтаах. Сорох-сорохтор сааларын хостоон сууйан-сотон баран, үөһээ-аллараа тыынан эрдэхтэрэ. Оттон тылбыйар кынаттаах этэрээтэ кэлэрэ күнтэн күн чугаһыыр. Манна экология, айылҕаны туһаныы миниистирэ Сахамин Афанасьев туох диэн хоруйдууруй?
— РФ айылҕа ресурсаларыгар уонна экологияҕа миниистирэ Дмитрий Кобылкин «эрэгийиэннэргэ сааскы бултааһыны хааччахтыырга» диэн сүбэтин тутан олоробут. Ол эрээри “сааскы булду хааччахтааһын” диэн бобуу буолбатах. Аҕыйах ахсааннаах хотугу норуоттарга, булдунан иитиллэн, аһаан олорор дьоҥҥо көҥүллэниэн сөп. Арассыыйа министиэристибэтэ коронавирус инфекцията куһу-хааһы кытта тэҥҥэ кэлсэн, тарҕаныа, дьон-сэргэ доруобуйатыгар кутталы үөскэтиэ диэн бигэргэппэт. Ол да буоллар, эрэгийиэннэр «изоляцияҕа» олордохторуна, толкуйдаммыт, кэлим миэрэлэри ыллахха сатанар.
Билигин улуустардааҕы булт уопсастыбаларыгар суруктары ыыттыбыт – дьүүллэһиҥ, этиилэргитин киллэриҥ диэн. Манна дьон-сэргэ доруобуйата бастакы миэстэҕэ туруохтаах. Онтон этиилэри үөрэтэн, ырытан көрөн баран, СӨ Бырабыыталыстыбатын иһинэн Булт уонна булт хаһаайыстыбатын сэбиэтигэр видео-кэмпириэнсийэ эрэсииминэн дьүүллэһиэхпит. Манна Роспотребнадзор, Борокуратуура, Росприроднадзор Саха сиринээҕи управлениелара, булт уопсастыбалара, наука тэрилтэлэрэ эмиэ кыттыахтара, санааларын истэн баран, сөптөөх быһаарыыны ылыахпыт. Бакаа бобулла илик диэн этиэххэ наада, — диэн кини эппиэттээтэ.
Ону тэҥэ, миниистир бүгүҥҥү Булчут күнүнэн эҕэрдэлээтэ.
— Өрөспүүбүлүкэҕэ Булчут күнэ 2012 сыллаахха олохтоммута, онтон ыла муус устар ый бастакы субуотатыгар бэлиэтэнэр. Булчут айылҕаны кытары ыкса ситимнээх, улахан эппиэтинэһи сүгэрин өйдүүр киһи. Онон бу күн айылҕаҕа харыстабыллаахтык сыһыаннаһар, булчут култууратын үрдэтэр сыаллаах тэриллибитэ. Төрөөбүт дойдубутун, айылҕабытын харыстыыр буоллахпытына, төрүт үгэстэрбитин, төрөөбүт тылбытын, култуурабытын эмиэ харыстыыбыт, — диэн Сахамин Миланович эҕэрдэтин тиэртэ.
Ангелина Васильева, «Саха сирэ» хаһыат, edersaas.ru
Хаартыска: megaoxota.ru