Ааспыт сыл бүтүүтэ литература сылын түмүктээн уонна киинэ сылын көрсө саха норуодунай суруйааччыта Николай Мординов – Амма Аччыгыйа «Сааскы кэм» романынан киинэ уһуллуохтаах. «Сахафильм» дириэктэрэ Дмитрий Шадрин уонна Таатта улууһун баһылыга Михаил Соров кыттыһан үлэлиир туһунан илии баттаспыттара. Киинэ «Сахафильм» уонна «Таатта улууһа» муниципальнай оройуон дьаһалтатын кыттыгас үбүлээһиннэринэн муус устар ыйга уһуллан саҕаланыа. Үксүн Таатта олохтоохторо уһуллуохтара.
Бу күннэргэ Тааттаҕа «Сааскы кэмҥэ» Микиитэ Лэглээрин оруолугар кастинг буолбута. Тааттатааҕы П.В. Толстяков аатынан норуодунай театр режиссера Мотрена Яковлева кэпсиир:
- Чөркөөх музейыгар улуустааҕы «Эдэр артыыс» диэн сыл аайы ыытыллар күрэхтэһиибит буолбута. Онно оҕолор хоһоон ааҕаллар, олоҥхолууллар, инсценировка туруоран көрдөрөллөр. Бу күрэхтэһии чэрчитинэн, Микиитэ Лэглээрин оруолугар кастинг тэрийбиппит. «Сахафильм» хампаанньаттан Алексей Романов бэйэтинэн кэлэн оҕолору көрдө-иһиттэ, талла. Кастиҥҥа барыта 50-тан тахса оҕо кыттынна. Олортон уонча оҕону киинэҕэ уһулларга таллыбыт. Кинилэр Микиитэ бииргэ үөрэнэр оҕолорун оонньуохтара. Хомойуох иһин, Микиитэҕэ сөптөөх уолу булбатыбыт. Кастиҥҥа кыттыбыт уолаттар бары уҥуохтарынан уһуттар, тас көрүҥнэринэн барсыбат курдуктар диэн быһаардыбыт. Былырыыҥҥы «Эдэр артыыс» күрэхтэһиибитигэр кыайбыт Ытык-Күөл 1-кы №-дээх оскуолатын үөрэнээччитэ Алеша Попов барсыан сөп курдук этэ. Алеша кастинг кэмигэр Дьокуускайга «Бэс Чагда» санаторийга эмтэнэ баран хаалбыт эбит. Онон Алексей Романовка Алешабыт былырыын кыттыбыт видеотын биэрэн ыыппыппыт. «Сахафильмҥа» видеоны көрөн баран, Алешаны Микиитэ оруолугар барсар оҕо эбит диэн, көрсөн кэпсэтиэх буолбуттара. Онон Микиитэбитин буллубут. Микиитэ Лэглээрини талбыппытын таһынан, Чөркөөх олохтоохторо Василий Ефремов, Анна Егорова уонна Иван Кулаковскай оруолларга тигистилэр. Кинилэр «Сааскы кэмҥэ» кырдьаҕастары оонньуохтара. Киинэни Амма Аччыгыйа төрөөбүт алааһыгар Хоптолооххо, Амма өрүскэ устан саҕалыахтара.
Амма Аччыгыйа 110 сыллаах үбүлүөйүнэн «Сахафильм» киинэ хампаанньата «Сааскы кэм» романы киинэ гынан оҥороллорун таһынан, өссө норуодунай суруйааччы олорон ааспыт олоҕун чахчыларыгар олоҕуран, документальнай киинэни усталлара былааннанар.
Айтана АММОСОВА