Сааскы кэм барахсан!

Ааптар: 
Бөлөххө киир:

Кыыдааннаах кыһыммыт ааһан сандал сааспыт барахсан сандаарыйан тиийэн кэлбитэ үчүгэйиэн! Сүрэх үөрэр, санаа сайдар кэрэ кэмэ.

Саха киһитэ былыр былыргыттан томороон тымныыны кытта тустан, чысхаан тыаллыын хатыйсан, укулаат тимир курдук уһаарыллан кэллэҕэ эбээт!
Былыр биһиги өбүгэлэрбит чоҥкучах алааска күннээҕи мастарын тыаҕа тахсан кэрдэн, оҕус сыарҕатыгар тиэйэн киллэрэн, баадаҥҥа ууран бөппүрүөк эрбиинэн эрбээн, көмүлүөк оһоҕу оттон, билигин санаатахха, ыарахан да олоҕу олорон ааспыттар эбит! Онно тэҥнээтэххэ, аныгы саха олоҕо быдан чэпчээтэҕэ дии. Уунан ититиллэр сылаас дьиэҕэ олоробут, маһынан оттуллар оһохтоох ыаллар даҕаны, былыргыга тэҥнээтэххэ, чэпчэтиилэрэ элбэх: «Дружба», «Штиль» эрбиинэн оттук мастарын саас эрдэ бэлэмнээн баран тыраахтарынан, массыынанан тиэнэллэр. Бэлэм куурбут маһынан оһохторун оттоллор.
Кыстыгы этэҥҥэ туораан күөххэ үктэнии — бу саха ыалыгар улахан үөрүү, бырааһынньык. Дьэ ол иһин бастакы бэлиэтээһин, тураах кэлиитэ, хаар быһыта сиэһинэ, харалдьык тахсыыта — бу сааскы көстүүлэр биһиэхэ, сахаларга, олус диэн күндүлэр, сүрэхпитин үөрүүнэн толороллор. Оҕо — аймах сааскы кэми эмиэ үлүскэн үөрүүнэн көрсөр. Күнү быһа, таһырдьаттан киирбэккэ салаасканан, араас аныгы тэриллэринэн сыыртан сырылыыр, хайыһардыыр , хаҥкылыыр, хаарынан сэриилэһэ оонньуур. Ону көрө — көрө , төрөппүттэр үөрэллэр. Тоҕо диэтэххэ, кыһынын дьиэҕэ хаайтаран олорон , оҕолор көмпүүтэр төлөпүөн кулута буолаллар, оботтороонньо ыарыытыгар ыллараллар.
Түгэҕэ биллибэт күөх халлаантан күн көмүс сарадах уоттарынан оонньуур, сып — сылааһынан иэдэспитин угуттуур. Кырыыһаттан таммахтар кылыгырыы тохтоллоро сааскы кэрэ муусука буолан иһиллэр. Сарсыарда турбутуҥ — дьэп — дьэҥкир муус чопчулара күн уотугар күлүмүрдүү
тураллара көрүөхтэн кэрэ!
Саас кэлэриттэн уһун кыһыны быһа никсик сыттаах хотоҥҥо хаайтаран турбут хороҕор муостаахтарбыт эмиэ киһиттэн итэҕэһэ суох үөрэллэр. Таһырдьа тахсаннар чэбдик салгынынан тыыналлар, күн уотугар сыламныыллар, аргыый аҕай хотолдьуһа хаамсаллар.
Сотору кэминэн тоҥ буору тобулу көтөн сахабыт сирин хорсун сибэккитэ ньургуһун тыллыаҕа, эдэркээн сүрэхтэргэ таптал уотун уматыаҕа!
Сааскы кэм барахсан! Эн наһаа да күндүгүн, күүтүүлээххин, санааҕа да эмнэрбити, санаарҕаабыт да көрүҥнэҕи сылааскынан сылаанньытаҕын, олоххо тардыһыытын күүһүрдэн биэрэҕин! Сааскы кэм барахсан эн сылааскын, сырдыккын, чаҕылхайгын! Сааскы кэм барахсан, мин эйигин таптыыбын, сахалыы уруйдуубун — айхаллыыбын!

Елена Прокопьева, уопсастыбаннай кэрэспэндьиэн.

Хаартыска: И.Рожин киэнэ

+1
0
+1
0
+1
0
+1
0
+1
0
+1
0
+1
0