Бас билии көрүҥүттэн тутулуга суох билигин өрөспүүбүлүкэ үрдүнэн, 145 тыһыынча таба баар, ити ааспыт сылы кытары тэҥнээтэххэ, 12,4 тыһыынчанан аҕыйах.
edersaas.ru
Табаны иитиигэ барыта 106 хаһаайыстыба идэтийэр, олорго 1295 киһи, ол иһигэр 1051 табаһыт, 244 чуумсук үлэлиир. Табаһыттар кыстаабыт сирдэриттэн сайыҥҥы маршруттарынан барыахтарын иннинэ, табаларын ааҕар, наардыыр , атыннык эттэххэ харааллыыр идэлээхтэр. Ол кэмҥэ бэтэринээрдэр тиийэннэр, ыстаада табаларын көрөллөр-истэллэр, эмтиир-сэрэтэр үлэни ыыталлар, хаан анаалыһын ылаллар.
Оттон хаһаайыстыбалар исписэлиистэрэ табаһыттары кытары сирэй көрсөн, зоотехническэй дьаһаллары тэрийэллэр, араас хаһаайыстыбаннай боппуруостары быһаараллар. Онон бу кылгас кэм иһигэр бэрт элбэх үлэни оҥорор ирдэнэр. Ол иһин биир идэлээхтэригэр атын нэһилиэктэртэн уонна улуустан бэтэринээрдэр тиийэн көмөлөһөллөр.
—Кыһын этэҥҥэ ааһан, быйыл табалар туруктара куһаҕана суох, – диир тыа хаһаайыстыбатын министиэристибэтин үгэс буолбут хотугу салааларга отделын салайааччы Иннокентий Баланов. — Туундара сирдээх Булуҥ уонна Өлөөн хаһаайыстыбалара сааскы хараалы түмүктээтилэр, оттон туундара былаастаах Эбээн Бытантай уонна Томпо табаһыттара саҥа саҕалаатыгар. Кинилэр табалары ааҕары, наардыыры таһынан, хаан анаалыһын ылаллар, эмтииллэр уонна чиип кэтэрдэллэр. Хараал муус устар ортотун эргин түмүктэниэҕэ.
Алдан, Өлөөн, Эдьигээн, Эбээн Бытантай улуустарыгар үгүс кутталы бөрө үөскэтэр. Ону утары охсуһарга хаһаайыстыбалар хапкаан, химическэй препарат, оттук-уматык саппаастарын итиэннэ сайын туттар тэриллэрин, астарын-үөллэрин кыһыҥҥы суолу өрүсүһэ баазаларга тиэрдэ сылдьаллар.
Раиса Сибирякова, «Саха сирэ» edersaas.ru
Хаартыскалары Иннокентий Баланов хааччыйда