Сааскы халааҥҥа бэлэмнэнии уонна ойуур баһаардарын эрдэттэн бохсууга үлэни тэрийии туһунан дьон-сэргэ токкоолосто

Бүгүн, олунньу 5 күнүгэр, «Саха» НКИХ, «Якутия24» ханаалларга, «Тэтим» араадьыйаҕа СӨ Бырабыыталыстыбатын Бэрэссэдээтэлин бастакы солбуйааччы Дмитрий Садовников, ОДьКХ уонна энергетикэ миниистирэ Вячеслав Емельянов, тырааныспар уонна суол хаһаайыстыбатын миниистирэ Владимир Сивцев, экология миниистирин э.т. Евгений Перфильев, нэһилиэнньэ олоҕор-дьаһаҕар куттал суох буолуутун хааччыйыыга судаарыстыбаннай кэмитиэт бэрэссэдээтэлэ Дмитрий Лепчиков, сыана бэлиитикэтигэр судаарыстыбаннай кэмитиэт бэрэссэдээтэлэ Антонина Винокурова, уо.д.а. ааспыт сыллааҕы үлэни-хамнаһы отчуоттаан иһитиннэриигэ кыттыыны ыллылар, биэрии кэмигэр киирбит ыйытыыларга хоруйдаатылар.

Ааспыт сайын Горнай улууһугар ойуур баһаарыттан эмсэҕэлээбит Бэс Күөлүн чөлүгэр түһэриигэ ыытыллыбыт үлэлэр тустарынан СӨ нэһилиэнньэ олоҕор-дьаһаҕар куттал суох буолуутун хааччыйыыга судаарыстыбаннай кэмитиэт бэрэссэдээтэлин солбуйааччы Яна Наумова кэпсээтэ. Кини уот солоон ааспыт сиригэр билигин саҥа дьиэлэр-уоттар тутуллан туралларын, онно олохтоохтор олороллорун бэлиэтээн эттэ. Бэрт кылгас кэм иһигэр отуттан тахса толору хааччыллыылаах дьиэ тутуллан кирбитин, күөх төлөн, уот ситимэ тардыллыбытын туһунан сырдатта. Маны таһынан хотоннору тутууга, тыа хаһаайыстыбатын тиэхиньикэтин ыларга, о.д.а. көмө оҥоһуллубутун кэпсээтэ.

Ойуур баһаардарыттан сылтаан уустук сайын ааспыта. Бэлиэтэммитинэн, өрөспүүбүлүкэ үрдүнэн сайын устатыгар 16 улууска 46 нэһилиэнньэлээх пууҥҥа ойуур баһаардара кутталы үөскэтэ сылдьыбыттара. Баһаары умуруорууга барыта 26 тыһыынчаттан тахса киһи кыттыбыта. Ол иһигэр атын эрэгийиэнтэн кэлбит ЫБММ, ойуур хаһаайыстыбатын үлэһиттэрэ, Оборуона министиэристибэтин, Саха сирин авиахампаанньаларын көтөр ааллара ойуур уотун умуруорууга үлэлээбиттэрэ. Оттон 2022 сылга Бэс Күөлүгэр саҥа оскуола тутуллуохтаах. Ону таһынан нэһилиэккэ сынньалаҥ киинэ былааннанар. Маны таһынан, ойууру баһаартан харыстыыр систиэмэ төрдүттэн уларытыллар. СӨ Ил Дархана ойууру чөлүгэр түһэриигэ үлэ тиһиктээхтик ыытыллыахтааҕын бэлиэтээбитэ.

Сааскы халааҥҥа бэлэмнэнии боппуруоһунан, Нам улууһун Ымыйахтааҕыттан ыйытыы киирдэ. Манна Иннокентий Андросов хоруйдаата: — Нам улууһун Ымыйахтааҕар ааспыт сылларга улахан бырайыак оҥоһуллан баран олоххо киирбэккэ турар. Маныаха Нам улууһун дьаһалтатын көҕүлээһининэн уонна СӨ Бырабыыталыстыбата өйөөн итиннэ даамба оҥоһуллан турар. Ити даамба ааспыт сылларга улахан халааҥҥа кэлэр ууну тутан турар. Онтон билигин СӨ Экология министиэристибэтин иһинэн үлэлиир Департамент уонна биһиги, нэһилиэнньэ олоҕо-дьаһаҕар куттал суох буолуутун хааччыйар кэмитиэппит итини кэтээн көрөбүт. Кэнэҕэски өртүгэр, биллэн турар, бу Ымыйахтаах халаан уутугар саамай элбэхтэ барбыт нэһилиэк буоларын быһыытынан, итиннэ хапытаалынай тутуу барара хайаан да ситиһиллиэхтээх. Үлэни Экология министиэристибэтин кытары бииргэ ыыта сылдьабыт, — диэн хоруйдаата.

Сыллааҕы үлэни-хамнаһы билиһиннэриигэ СӨ нэһилиэнньэ олоҕор-дьаһаҕар куттал суох буолуутун хааччыйыыга судаарыстыбаннай кэмитиэт салалтата: бэрэссэдээтэл Дмитрий Лепчиков, бэрэссэдээтэли бастакы солбуйааччы Иннокентий Андросов, бэрэссэдээтэли солбуйааччы Яна Наумова кыттыыны ыллылар, киирбит ыйытыыларга хоруйдары биэрдилэр.