Сааскы халааҥҥа бэлэмнэнии туһунан

Оройуон бэрэстэбиитэллэрэ уонна биэдэмистибэлэр кыттыылаах мунньахтарыгар өрөспүүбүлүкэҕэ гидрометеорологическай усулуобуйа туһунан иһитиннэриини билиһиннэрдилэр. Бу сылга кыра өрүстэргэ хаар саппааһа элбэҕэ бэлиэтэнэринэн, халаанныан сөп. Оттон Лена, Алдан, Халыма өрүстэр сорох сирдэринэн муус халыҥа 10-40 см нуорматтан улахан, онон муус харыыта тахсыан сөп.

Сааскы халааны сэрэтэр туһуттан, Өлүөнэтээҕи уу бассейнын управлениета (БВУ) РФ ЫБММ ГУ,  Росприроднадзор, Ростехнадзор, Росрыболовство тэрилтэлэрин кытары гидротехническэй тутуулары уонна ууга барыан сөптөөх кутталлаах хаһаайыстыбаннай, бырамыысыланнай эбийиэктэри  чинчийэн көрүөхтэрэ.

Харыы тахсыан сөптөөх 77 учаастагар мууһу кэбирэтиигэ анаан, уопсайа 31,7 мөл.солк.суумалаах үлэ ыытыллыа. Көтө сылдьан кэрийэн көрүүгэ, чуҥнааһыҥҥа  10 салгын аала, РФ ЫБММ биир көтөр суудуната бэлэм. Барыллаан көрүүнэн, сааскы халааҥҥа өрөспүүбүлүкэ 24 оройуонугар 123 нэһилиэнньэлээх пуун барыан сөптөөҕө этилиннэ.

Билиҥҥи кэмҥэ халааҥҥа барбат туһугар ыксаллаах быһыыны-майгыны сымнатарга туһуламмыт тэрээһиннэр былааннарын, ыксаллаах түгэҥҥэ сөптөөх хардыыны оҥорорго, о.д.а. суолталаах боппуруостары быһаараллар.

«Саамай сүрүн — куттал суох буолуута. Онон араас ыксаллаах быһыы-майгы тахсыбатын курдук, барыта кэмигэр  бэлэм буолуохтаах. Бэлэмнэнии кэмигэр туох эрэ ыйытыы, этии баар буоллаҕына, эппиэтинэстээх салайааччыларга тута этэн, ыйытан иһиҥ. Боппуруостары быһаарыахпыт», — диэтэ СӨ Бырабыыталыстыбатын Бэрэссэдээтэлэ Андрей Тарасенко бары улуустар баһылыктарыгар, тэрилтэ салайааччыларыгар туһаайан.