Сааскы халааҥҥа бэлэмнэнии саҕаланна

Бөлөххө киир:

Бу күннэргэ Уу ресурсаларын Федеральнай агентствотын Өлүөнэ сүнньүнээҕи ууга управлениетын Научнай-техническэй сэбиэтин мунньаҕар, өрөспүүбүлүкэ  өрүстэригэр харыы тахсар сирдэригэр мууһу кэбирэтэр үлэлэри ыытыы үлэлэрин тула кэпсэттилэр.

Маннык үлэлэр, сүрүннээн, сааскы халаан кэмигэр муус харыыта үөскээн, өрүстэр хааларыттан тахсан нэһилиэнньэлээх пууннары ылбаттарын туһуттан оҥоһуллаллар.
Сэбиэт мунньаҕар Уу ресурсаларын Федеральнай агентствотын Өлүөнэ сүнньүнээҕи ууга управлениетын салайааччытын эбээһинэһин толорооччу Петр Аргунов, «Центррегионводхоз» тэрилтэ «Ленарегионводхоз» филиалын дириэктэрин  эбээһинэһин толорооччу Александр Аржаков, СӨ нэһилиэнньэтин олоҕор-дьаһаҕар куттал суох буолуутун хааччыйар судаарыстыбаннай кэмитиэт бэрэссэдээтэлин бастакы солбуйааччы Иннокентий Андросов, Ыксаллаах быһыы-майгы министиэристибэтин гражданскай оборонаҕа уонна нэһилиэнньэ көмүскэллээх буолуутун Саха сиринээҕи управлениетын начаалынньыга, полковник Александр Никифоров, СӨ Айылҕаны туһаныы уонна ойуур хаһаайыстыбатын Уу сыһыаныгар уонна сырдатар үлэни ыытыыга департаменын салайааччыта Зинаида Васильева, Гидрометеосулууспа Саха сиринээҕи салаатын началынньыгын солбуйааччы Вячеслав Шехиров уонна да атыттан  кытыннылар.
Гидрометеосулууспа Саха сиринээҕи салаатын начаалынньыгын солбуйааччы Вячеслав Шехиров Саха сирин өрүстэрин билиҥҥи туругун туһунан кэпсээтэ. Кини бэлиэтээбитинэн, быйылгы көмүөл мууһа өр сыллаах кэтээн көрүү орто кэрдииһинэн күүтүллэр, муус харыыта тахсыан сөбө бэлиэтэнэр. Ол эрээри муус харыыта өрүстэр эстэр кэмнэригэр ол кэмнээҕи метеорологическай усулуобуйаттан тутулуктанар.
Өлүөнэ уонна Халыма өрүстэригэр мууһу кэбирэтии үлэлэрин ыытыы туһунан «Центррегионводхоз» тэрилтэ «Ленарегионводхоз» филиалын дириэктэрин  эбээһинэһин толорооччу Александр Аржаков кэпсээтэ. Быйылгыттан бу тэрилтэ мууһу кэбирэтии үлэлэрин Саха сирин 8 оройуонугар ыытыаҕа. Маннык кэбирэтии үлэлэрэ Өлүөнэ уонна Халыма курдук улахан өрүстэр харыы тахсар 46 сиринэн ыытыллыа, ол курдук хараардыы үлэтэ – 39 учаастакка, 486 гектарга, эрбээһин – 7 учаастакка, 41 км оҥоһуллуоҕа.
Алдан, Амга, Нюя и Токко өрүстэригэр мууһу кэбирэтэр үлэлэр тустарынан
СӨ Айылҕаны туһаныы уонна ойуур хаһаайыстыбатын министиэристибэтин Уу сыһыаныгар уонна сырдатар үлэни ыытыыга департаменын салайааччыта Зинаида Васильева кэпсээтэ. Бу өрүстэргэ кэбирэтии үлэтэ  харыы тахсар 31 сиригэр 213 гектарга 9 улууска субвенция быһыытынан федеральнай үп-харчы суотугар ыытыллыа.
Бу халаан иннинээҕи бэлэмнэнии үлэлэрин схемата Ыксаллаах быһыы-майгы министиэристибэтин гражданскай оборонаҕа уонна нэһилиэнньэ көмүскэллээх буолуутун Саха сиринээҕи управлениетын, Уу ресурсаларын Федеральнай агентствотын Өлүөнэ сүнньүнээҕи ууга управлениетын уонна «Росрыболовство» Илин Сибиирдээҕи управлениета сөбүлэһиилэринэн бигэргэнэр.

Уу ресурсаларын Федеральнай агентствотын Өлүөнэ сүнньүнээҕи ууга управлениетын пресс-сулууспата

+1
0
+1
0
+1
0
+1
0
+1
0
+1
0
+1
0