Сааскы аармыйаҕа сүүмэрдээһин түмүгүнэн, 1500 ыччат ытык иэһин төлүү барда
Муус устар 1 күнүттэн от ыйын 15 күнүгэр диэри аармыйаҕа сулууспалыы илик уолаттары сүүмэрдээһин буолла. Сааскы сүүмэрдээһин түмүгүнэн 1500 уол медицинскэй хамыыһыйаны ааһан, араас байыаннай чаастарга ананан ытык иэстэрин төлүү бардылар. Онтон хантараагынан сулууспа5а уопсайа 20-чэ баҕалаах уолтан, түөрдэ сулууспалыыр чаастарыгар тиийдилэр. Икки уол Сахалиҥҥа ананан, сулууспалыы барар күннэрин кэтэһэллэр. Уоннааҕылар доруобуйаларынан сыыйыллыбыттар.
Быйылгы байыаннай медицинскэй хамыыһыйа бэлиэтииринэн, ыччакка сүрүннээн сүрэх ыарыыта уонна уойуу элбээбит. Уойуу физическэй хамсаныы тиийбэтиттэн буоларын СӨ байыаннай хамыһаарын эбээһинэһин толорор полковник Аркадий Саввинов бэлиэтиир. Онтон СӨ байыаннай хамыһаарын көмөлөһөөччүтэ полковник Иван Федоров сулууспалыы барыан баҕалаах ыччат сыл ахсын элбээн иһэрин бигэргэттэ. Кэнники сылларга сулууспалыы сылдьан буруйу оҥоруу аччаабыт. Быйыл Саха сириттэн сулууспалыы сылдьар уолаттартан улахан буруйу оҥоруу, устаабы кэһии тахсыбатах. Хантараагынан сулууспалыы барыан баҕалаах ыччат элбээбит. Оборона министиэристибэтин кытары хантараак түһэрсиэн баҕалаах ыччакка анаан эбии үп, субсидия көрүллэрин, хантараагынан сулууспаҕа сүүмэрдиир пуун салайааччыта подполковник Андрей Герасименко билиһиннэрдэ:
—Хантараагынан сулууспа хамнаһа 23 тыһыынча солкуобайтан саҕалаан 80 тыһыынчаҕа тиийэр. Өссө байыаннай ипотека көрүллэр. Ол курдук, алта сыллаах сулууспа тухары дьиэ ыларга үп мунньуллар. Иккис хантараак бүтүүтэ, байыаннай мунньуммут харчытыгар Арассыыйа хайа баҕарар муннугар дьиэ атыылаһар бырааптанар. Хоту регионнарга сулууспалыы сылдьар ыччат биир сыллаах сулууспата икки сылынан ааҕыллар. Ол курдук, уон сыллаах сулууспа кэнниттэн, биэнсийэҕэ тахсар бырааптаналлар. Аны сыл ахсын уоппуска көрүллэр, сынньана барарга сулууспалааччыга уонна кини дьиэ кэргэнниттэн биир киһиэхэ айан харчыта төлөнөр. Эбиитин төрөппүттэрэ уонна дьиэ кэргэнэ босхо медицинэ өҥөтүнэн хааччыллаллар.
Николай ПОПОВ, «Саха сирэ» хаһыат, edersaas.ru