Аҕам саастаахтар аан дойдутааҕы күннэринэн, өрөспүүбүлүкэ улуустарыгар тэрээһиннэр куйаар ситиминэн күргүөмнээхтик саҕаланнылар.
Таатта улууһугар Ытык Күөллээҕи киин бибилэтиэкэ бу бэлиэ күҥҥэ кыттыһан, куйаар ситиминэн «Саас ылбат буочара» диэн кырасыабай буочарга күөн күрэс биллэрбит. Бу туһунан бибилэтиэкэр Софита Климоваттан сырдатарыгар көрдөстүм.
—Аҕам саастаахтарбытыгар ананар нэдиэлэҕэ, улуустааҕы социальнай управление ыытар тэрээһиннэригэр бибилэтиэкэ хайаан да кыттыһар. Бастатан туран, дьон-сэргэ болҕомтотун тардар туһуттан, үлэбит өттүттэн, куруук саҥа, сонун сүүрээни киллэрэргэ кыһаллабыт. Онуоха олох уларыйан истэҕин ахсын, ирдэбил эмиэ тэҥҥэ улаатан иһэрэ өйдөнөр. Маҥнай, ааспыт сыллардааҕы үлэлэрбититтэн бэрт кылгастык сырдаттахха, Ытык Күөл киинигэр, аҕам саастаахтар олорор дьиэлэригэр, сыл ахсын, сахалыы киинэ көрдөрөр үгэстээх этибит. Кырдьаҕастар үөрүү, сэргэхсийии бөҕө буолааччылар. Киинэ кэнниттэн хайаан да санааларын үллэстээччилэр. Ол эрээри, хомойуох иһин, коронавирус дьаҥынан быйыл ону тохтоторго күһэлиннибит. Итини сэргэ, нэдиэлэ чэрчитинэн, хас да сыл бибилэтиэкэҕэ буор босхо компьютерга үөрэппиппит. Наһаа сөбүлүүллэр, сэҥээрэллэр. Ол түмүгэр, билигин компьютерынан холкутук туһанар кырдьаҕастар элбэхтэр.
Быйылгы тэрээһиммит, куйаар ситиминэн да буоллар, саастаахтарбытын сэргэхситиэ диэн эрэнэбит. Ол курдук, биир нэдиэлэ устатыгар «Саас ылбат буочара…» диэн кырасыабай буочарга улуустааҕы куонкурус биллэрилиннэ. Куонкуруска кыттыы босхо. Манна 65-тэн үөһээ саастаахтар күрэстэһэллэр.
Ирдэбилэ судургу. Бэриллибит айымньыттан көрөн олорон быһа тардыыны саамай кырасыабай буочарынан сөпкө устан ылыахтаахтар. Ааттарын, саастарын, аадырыстарын, төлөпүөннэрин толору ыйаллар. Күрэс алтынньы 1 күнүттэн саҕаланна. Алтынньы 6 күнүгэр түмүктэнэр. Үлэлэрин хаартыскаҕа түһэрэн баран, «Кырасыабай буочар» диэн бэлиэтииллэр уонна биһиги биллэрбит электроннай аадырыспытыгар, эбэтэр биллэриигэ суруллубут суотабай төлөпүөн ньүөмэригэр батсаабынан ыыталлар. Оттон күрэс түмүгүнэн 1,2,3 миэстэни ылбыт дьон дипломнарынан наҕараадаланыахтара.
Итини таһынан, ытык кырдьаҕастарбыт сынньана олорон «Кэрэхсэбиллээх кэпсээннэргэ» аудиокэпсээннэри истиэхтэрэ. Манна Дьокуускай куораттан мөлтөхтүк көрөр уонна көрбөт дьон өрөспүүбүлүкэтээҕи анал бибилэтиэкэлэрэ бэлэмнээбит, устубут аудиокэпсээннэрин ыыппыттарыгар махтанабыт.
Итиэннэ олохтоох ааптар Агафья Афонина «Көмүс түгэн» диэн саҥа кинигэ-альбомун эмиэ куйаар ситиминэн билиһиннэриэхпит. Инстаграмҥа аҕам саастаах ааптардарбыт кинигэлэрин сырдатыахпыт. Ытык күөлгэ кырдьаҕастар олорор дьиэлэригэр ааҕалларыгар анаан кинигэ, сурунаал илдьиэхпит.
Быйылгы үлэбит уратыта итинник. Аҕам саастаахтар көхтөөхтүк кыттыахтара, санааларын үллэстиэхтэрэ диэн эрэнэбит.
Хаартыскалар Ытык Күөл киин бибилэтиэкэтин архыыбыттан