Кырдьаҕастар уонна инбэлииттэр олорор Капитоновкатааҕы интэринээт-дьиэҕэ инсульт, инфаркт уо.д.а. ыарахан ыарыылар кэннилэриттэн инбэлиит буолбут уонна аҕам саастаах дьон олорор.
edersaas.ru
Кинилэргэ арт-терапия дьарыктара доруобуйаларын чөлүгэр түһэрэргэ, олоххо тардыһалларыгар олус көмөлөһөллөр. Ол да иһин, «Бигэ» хампаанньа Үтүө дьулуур (доброволец) сылын чэрчитинэн уонна сандал сааһы көрсө интэринээт олохтоохторугар аһымал ааксыйаны оҥордулар.
«Бигэ» исписэлиистэрэ бэйэлэрин бородууксуйаларын – араас өҥнөөх акриловай кырааскалары аҕалан, арт-терапия ыыттылар. Кинилэр көмөлөрүнэн иитиллээччилэр идэлээх уруһуйдьут Евгений Кононов оҥорбут мас кыылларын дьэрэкээн өҥнөрүнэн кырааскалаатылар.
Хампаанньа маркетолога Софья Шилова эппитинэн, акриловай кырааскалар киһи доруобуйатыгар буортута уонна сыта суохтар. Бу кырааскалары оҕо да, улахан да киһи дьиэтигэр-уотугар, дууһатын сынньатарга туһаныан сөп.
Хампаанньа дириэктэрэ Андрей Неустроев бу ааксыйаны тоҕо тэрийбиттэрин туһунан:
«Биһиги номнуо бэһис сылбытын маннык кырааскалары оҥоробут. Собуоппут Кангаласс с. баар. Былырыын миэбэли сотор кырааскалары оҥорбуппутун бу аҕаллыбыт. Тулалыыр эйгэттэн тэйиччи олорор кырдьаҕастар күннээҕи олохторун тугунан эмэ сэргэхситиэхпитин, настарыанньаларын көтөҕүөхпүтүн баҕарбыппыт. Ол иһин, маннык ааксыйаны тэрийдибит. Уопсайынан, «Саха сирин Технопаркатын» кытары киин куораппытыгар оҕо былаһааккаларын кырааскалыыбыт. Акриловай кырааскаларбыт экология өттүнэн ыраастар, түргэнник куураллар уонна тымныыны тулуйаллар» – диэн үөрэ-көтө кэпсээтэ.
«Биһиги дьоммут маннык дьарыктартан олус үөрэллэр, сэргэхсийэллэр. Бүгүн Андрей Неустроев салайааччылаах «Бигэлэр» бэйэлэрэ көҕүлээн биһиэхэ кэлбиттэриттэн олус үөрдүбүт. Онон, ыарыһахтарбытыгар, инбэлииттэрбитигэр улахан көмөнү оҥордулар», – диэн интэринээт-дьиэ дириэктэрин солбуйааччы Наталья Васильева иһитиннэрдэ.
Кырдьыга да, интэринээт олохтоохторо олус үөрбүттэрин, астыммыттарын илэ харахпытынан көрөн тэҥҥэ долгуйдубут. Хас биирдиилэрэ, оҕо саастарыгар түспүттүү, бэйэлэрин үлэлэрин үөрэ-көтө көрдөрдүлэр, хосторугар илдьэн атын да үлэлэрин көрдөрүөхтэрин баҕардылар. Холобур, Семен Романов уруһуйдуу олорон, оҕо сааһын, дойдутун, дьонун-сэргэтин санаан аһарбытын туһунан иһирэхтик билиннэ.
Аҕа саастаах дьон баҕа өттүлэринэн хомустаан, ыллаан кэлбит ыалдьыттарыгар махтаннылар, кинилэри умнубаттарыгар, кэлэн сэргэхситэ туралларыгар көрдөстүлэр.
Надежда ЕГОРОВА, «Саха сирэ» хаһыат, edersaas.ru
Мария ВАСИЛЬЕВА түһэриилэрэ