Саамай чэпчэки сыаналаах уонна сибиэһэй тоҥ балык ханна баарый?

Сарсын субуотаҕа, ахсынньы 23 күнүгэр, Дьокуускайга Хомсомуол болуоссатыгар “Саха сирин балыга – 2017” өрөспүүбүлүкэтээҕи дьаарбаҥка иккис түһүмэҕэ ыытыллыа. Саната таарыйа эттэххэ, маҥнайгы түһүмэх быйыл күһүн икки күн устата тэриллибитигэр 25 туонна оннугар 50 туонна сайыҥҥы балык атыыланан турар.

edersaas.ru

Билигин атыыланар балык барыта муус аннынан бултаммыт уонна тоҥнуу кыһан сииргэ анаммыт буолан, Саҥа дьыллааҕы сандалы мааны аһа буоларыгар киһи саарбахтаабат. Улахан дьаарбаҥканы Арктика дьыалаларыгар судаарыстыбаннай кэмитиэт уонна “Якутская ярмарка” АУо тэрийэллэр. Кэмитиэт балык хаһаайыстыбатыгар салаатын салайааччыта Прокопий Кириллин иһитиннэрэринэн, дьаарбаҥкаҕа балыксыт хаһаайыстыбалар быһаччы кыттаннар, бэйэлэрэ тутан-хабан атыылыахтара. Онон, тэрийээччилэр тоҥ балык ырыынакка “олохсуйбуттан” балачча чэпчэки сыаналаах буоларын мэктиэлииллэр. Чопчу төһө буолуоҕай?

Хотугу улуустартан балыгы тутарын сэргэ тиэйиигэ-таһыыга, астааһыҥҥа баһылыыр-көһүлүүр оруоллаах тэрилтэ – “Туймаада-Агроснаб” ААУо генеральнай дириэктэрэ Павел Чириков: “Балык сыаната бэрт элбэх ороскуотунан оҥоһуллан тахсар сүөһү этиттэн ыарахан буолуо суохтаах. Биһиги муус аннынан бултаммыт чыырга, муксууҥҥа сыананы 480 солкуобайтан халбаҥнаппаппыт. Саха сиригэр уматык атыылыыр хампаанньалар “Саханефтегазсбыт” ААУо сыанатынан сирдэтинэллэрин курдук, балыкка биһигини тутуһаллар”, — диэн хоруйдаата.

Павел Петрович кэпсииринэн, муус аннынан бултаммыт 23 туонна чыыр уонна муксуун балыктары Усуйаана, Аллайыаха, Аллараа Халыма, Орто Халыма, Үөһээ Халыма улуустарыттан сөмөлүөтүнэн аҕалан, Саҥа дьылы көрсө атыыга ахсынньы 15 күнүттэн таһаарбыттар. Хампаанньа Киров аатынан уулуссаҕа турар фирменнэй киоскатыгар быһыллыбыт сыананан атыыга күн аайы киирэр эбит. Ким ыксаабыт, бириэмэтэ суох Саҥа дьыллааҕы сандалытыгар онтон атыылаһыан сөп. Ол эрээри, саха киһитэ илиитинэн-атаҕынан тутан-хабан, сыллаан-сытыккаан көрдөҕүнэ биирдэ астынар идэлээх. Балык дьаарбаҥката биир эрэ күн буолар. Онон “тэпсэ сылдьан” талан атыылаһар түгэҥҥитин мүлчү тутумаҥ!

Тэҥнэбилгэ эттэххэ, «Сайсары» бааһынай ырыынагар уонна биллэриинэн эргиэмсиктэр тоҥ балык мургунун 7-8 мөһөөххө (киилэтин) атыылыыллар.

Тылдьыт

Чир — муҥур.

Муксун — чорбоҕор.

Сахалыы саҥара, суруйа үөрэниэҕиҥ!

Василий НИКИФОРОВ, «Саха сирэ» хаһыат, edersaas.ru