Саамай «баай» дьокутаат дохуота 136 мөл. солкуобай

Бөлөххө киир:

Бу күннэргэ батсаапка Саха сиригэр олорор үрдүк хамнастаах чунуобунньуктар, бэлиитиктэр испииһэктэрэ тарҕанна. Саамай элбэх дохуоттааҕынан дьокутаат Виктор Федоров ааттаммыт. Ыйдааҕы хамнаһа 18 мөл. солк. диэн суруйбуттар. Төһө кырдьыгын-сымыйатын билээри, 2015 сыллааҕы дохуоттарын туһунан докумуону Ил Түмэн сайтыгар киирэн көрдүм.

Анивера Акимова, «Саха сирэ» хаһыат, https://edersaas.ru/

2016 сыллааҕы дохуоттарын туһунан иһитиннэриини баччааҥҥа диэри киллэрэ илик буоланнар, 2015 сыллааҕы түмүгү көрүөххэ (дьокутааттар дохуоттарын туһунан докумуону ким баҕарар Ил Түмэн сайтыгар «Противодействие коррупции» диэн түһүмэххэ киирэн көрүөххүтүн сөп).

Ил Түмэн спикерэ Александр Жирков 2015 сыллааҕы дохуота 6 мөл. 276 тыһ. солк. тэҥнэспит. Маны 12 ыйга түҥэттэххэ, 523 тыһ. солк. тэҥнэһэр. Оттон КПРФ лидерэ, бэрэссэдээтэли солбуйааччы Виктор Губарев сыллааҕы дохуота 3 мөл. 151 тыһ. солк. Биир ыйга 262 тыһ. солк. Мантан салгыы саамай элбэх дохуоту аахсыбыт дьокутааттары ылан көрүөххэ.

Саамай баай дьокутааттар

— Ил Түмэн экономика, инвестиция, бырамыысыланнай бэлиитикэ сис кэмитиэтин бэрэссэдээтэлэ, «Биир ньыгыл Россия» баартыйа чилиэнэ Виктор Федоров сыллааҕы дохуота 136 мөл. 778 тыһ. солк. Ол аата, ыйга ортотунан 11 мөл. 368 тыһ. солк. (Батсаапка 18 мөл. диэн хантан ылбыттара буолла?) Бэлиитик сыаналаах малы-салы, ол иһигэр дьиэтин атыылаан дохуот аахсыбыт буолуон сөп.

— «Анаабыр алмаастара» ААУо урукку генеральнай дириэктэрэ Матвей Евсеев сыллааҕы дохуота 61 мөл. 148 тыһ солк. Ыйдааҕы дохуота ортотунан 5 мөл. солкуобайтан тахса. Былырыыҥҥыттан атын үлэҕэ көһөн, дохуота төһө эбит намтаабыт, биитэр улааппыт буолуон сөп. Ону 2016 сыллааҕы түмүк көрдөрүө.

— «Якутскэнерго» ПАУо генеральнай дириэктэрэ Олег Тарасов сыллааҕы дохуота 42 мөл. 751 тыһ. солк. Ыйдааҕы дохуота ортотунан 3 мөл. 562 тыһ. солк. Олег Владимирович ыйдааҕы хамнаһын туһунан аһаҕастык этэр киһи.

— Иван Андреев 2015 сыллааҕы дохуота 36 мөл. 726 тыһ. солкуобайынан ааҕыллыбыт. Ол аата ыйга 3 мөл. 60 тыһ. солк. тэҥнэһэр.

— Урбаанньыт Гаврил Парахин сыллааҕы дохуота 32 мөл. солк. Ыйдааҕы дохуота ортотунан 2,6 мөл. солк.

— «АЛРОСА» АХ вице-президенэ Юрий Окоемов сыллааҕы дохуота 33 мөл. 46 тыһ. солк. Ыйдааҕы дохуота ортотунан 2 мөл. солкуобайтан тахса.

— Дьокутаат Марианна Магомедова дохуота 33 мөл. 595 тыһ. солк. отчуоттаабыт. Ыйга эмиэ ботуччу суума тахсар.

— ХИФУ ректора Евгения Михайлова 2015 сыллаахха 13 мөл. 847 тыһ. солк. дохуоту аахсыбыт.

«Дьадаҥы» дьокутааттар

Өрөспүүбүлүкэҕэ олохтоммут орто хамнастан эрэ үрдүк хамнастаах дьокутааттар эмиэ бааллар. Холобур, Алена Атласова 2015 сыллаахха 837 406 солк. аахсыбыт. Маны ыйга таһаардахха – 69 тыһ. солк. тахса. (Батсаапка 400 тыһ.солк. диэн суруйбуттара сымыйа эбит). Аммосов Петр сыллааҕы хамнаһа – 449 810 солк. (ыйга 37 тыһ. солк.);

Бу маны чопчу хамнастара диир табыллыбат. Ким эрэ дьиэ, массыына атыылаан, онтун декларацияҕа киллэрбит буолуон сөп. Аны сотору кэминэн 2016 сыллааҕы түмүк тахсыаҕа.

Анивера Акимова, «Саха сирэ» хаһыат, https://edersaas.ru/

+1
0
+1
0
+1
0
+1
0
+1
0
+1
0
+1
0