СӨ Култуура миниистирэ Юрий Куприянов быһа биэриигэ ыйытыыларга хоруйдаата, санаатын үллэһиннэ:
—2020 сылга «Саамай ааҕар эрэгийиэн» Бүтүн Арассыыйатааҕы улахан күөн күрэс сүрүн бириэмийэтинэн наҕараадаламмыппыт. Бу барыбыт улахан ситиһиибит. Оттон быйыл туохха тардыһабытый? Биллэн турар, инники күөҥҥэ сылдьарга дьулуһабыт, үс бастыҥ иһигэр киирэр санаалаахпыт. Бу үтүө ааты куруук тута сылдьар туһугар кыһаллыахтаахпыт. Маннык ситиһиигэ бары улуустарбыт бибилэтиэкэлэрэ, дьоно-сэргэтэ сомоҕолоһон көмөлөһөллөр.
Өрөспүүбүлүкэбитигэр 503 бибилэтиэкэ баар. Итинтэн үһэ эрэ судаарыстыбаннай. Атыттар бары муниципальнайдар. Санаан кэбиһиҥ, бу улахан аармыйа барыта турунан, өрө көтөҕүллүүлээхтик уонна тиһиктээхтик эһигинниин үлэни ыытан, Саха сирэ дойду саамай ааҕар эрэгийиэнинэн буолан, «Арассыыйа литературнай флагмана» диэн дьоһун ааты ылары ситиспиппит. Манна өссө «Бичик» национальнай кинигэ кыһатын эбэбит. Өссө СӨ Доруобуйа харыстабылын министиэристибэтин өйөбүлүнэн, «Бары ааҕабыт!» социальнай суолталаах бырайыак иитинэн, саҥа оҕоломмут ийэлэргэ уонна кинилэр кырачааннарыгар бибилэтиэкэ кинигэ бэлэхтэри оҥороро эмиэ улахан суолталаах диэн мин манна сыһыары тутан бэлиэтиэхпин баҕарабын. Итинтэн да атын холобурдар бааллар. Ити курдук, биһиги өрөспүүбүлүкэбит үтүөҕэ, кэрэҕэ, билиигэ-көрүүгэ тардыһыытынан, далааһыннаах, дириҥ суолталаах үлэлэри эрдэттэн тэрийэринэн өрүү инники кэккэҕэ сылдьар уонна онно сылдьар туһугар дьулуһуохтаахпыт.
* * *
“Саамай ааҕар эрэгийиэн” диэн Бүтүн Арассыыйатааҕы куонкурус сыллата киэҥ далааһыннаахтык ыытыллар. Бу маассабай ааҕыыга күрэс аан бастаан 2015 сыллаахха, РФ — Литература сылыгар, көхтөөхтүк, сэргэхтик тэриллэн ыытыллыбыта, улахан болҕомтону тардыбыта. Ити күөн күрэскэ Ульяновскай уобалас кыайыылааҕынан тахсыбыта. Онтон 2016 сыллаахха «Арассыыйа литературнай флагмана» үрдүк ааты Воронеж уобалаһа ылан үөрүү-көтүү өрөгөйө буолбута. Эһиилигэр, ол эбэтэр 2017 сылга — Санкт-Петербург, 2018 сылга Иркутскай уобалас, 2019 сылга Белгород кыайыылаах аатын ылбыттара. Онтон 2020 сылга Саха сирэ — «Саамай ааҕар эрэгийиэн» үрдүк ааты дьоһуннаахтык сүкпүтэ.
Хаартыска: context-up.ru