Саалаах талабырдьыт — үрдүк үөрэх кыһатыгар преподавателинэн үлэлии сылдьыбыт киһи
Соторутааҕыта, тохсунньу 10 күнүгэр, Дьокуускай куорат Дежнев аатынан уулуссатыгар баар арыгы маҕаһыынын сарбыдах саалаах киһи киирэн талаабытын туһунан биһиги сайтпытыгар иһитиннэрэн турабыт. Бу талааһыҥҥа уорбаланааччыны полиция оперативниктара туппуттарын туһунан СӨ ИДьМ-тын пресс-сулууспата иһитиннэрдэ.
Кини кимин билэн баран, бэркиһээн да төһөнү бэркиһиэҥий — «дьэ, буолар да эбит!» диэн саҥа аллайаргар эрэ тиийэҕин.
Санатар буоллахха, ол тохсунньу 10 күнүн киэһэтигэр, 20.00 чаас саҕана, талабырдьыт алкомаркетка киирэн, саанан үөһэ биирдэ ытан баран, хас да бытыылка арыгыны алдьатан, атыылааччыны куттаан туран, 47 тыһ. солк. харчыны ылан тахсыбыт этэ. Ол талааһын видеота тута социальнай ситимнэринэн тарҕаммыта.
Бу чахчынан «Талааһын» ыстатыйанан холуобунай дьыала тэриллибитэ.
Бэҕэһээ, тохсунньу 15 күнүгэр, Дьокуускай куорат полициятын оперативниктара бу уорбаланааччыны туттулар — Өймөкөөнтөн төрүттээх 37 саастаах киһи эбит.
Урут холуобунай эппиэтинэскэ тардылла сылдьыбатах, биир үрдүк үөрэх кыһатыгар преподавателинэн үлэлии сылдьыбыт.
Уорбаланааччы билиммитинэн, кини ол талаабыт харчытынан Новосибирскайга авиабилиэт атыыласпыт.
Сарбыдах саатын (обрез) бэйэтэ оҥостубут. Саатын былдьаабыттар.
Билигин уорбаланааччыны силиэстийэлиир изоляторга хаайар туһунан боппуруос көрүллэр.
Уорбаланааччы үс хостоох кыбартыыралаах уонна джип массыыналаах диэн News.ykt.ru суруйар.
Биһиги корр., «Саха сирэ» хаһыат, edersaas.ru
Хаартыскалар: СӨ ИДьМ-тын пресс-сулууспата