Биһигиттэн үгүспүт харайыллар болдьоҕо ааспыт аһы, түүнүгүрбүт хос сыттаах сыыры, аһыйбыт үүтү, суораты, курсуйбут бичиэнньэни, эргэрэн кубарыйбыт сакалааты атыыласпыт, ону төттөрү илдьэн биэриэхпитин сүрэҕэлдьээбит түгэммит үгүс. Оннук хаалан иһэр. Сорохтор УЗИ-га, МРТ-га ыйы-ыйдаан толуон сатаан ылбаттар, наадыйар быраастарыгар кыайан киирбэттэр, арай харчыга баран көрдөрүҥ ээ диэн бэлэм эппиэти истэллэр.
edersaas.ru
Маннык түгэҥҥэ «Наша Якутия» диэн мобильнай сыһыарыы нөҥүө ОДьКХ, суолга-иискэ, электроннай судаарыстыбаннай уонна муниципальнай өҥөнү оҥорууга, уопсастыбаннай тырааныспарга, оптуобус тохтобулугар, сибээс, интэриниэт өҥөтүгэр, экология кыһалҕаларыгар сыһыаннаах, уо.д.а ыйытыылары биэриэххин, бырааска сатаан суруттарбатаххына, поликлиникаҕа уочаракка олорон, күҥҥүн-дьылгын бараатаххына, уопсастыбаннай аһылык эйгэтигэр бэрээдэги тутуспатахтарына, болдьоҕо тахсыбыт табаары атыыластаххына, үҥсүү хаалларыаххын сөп.
Судаарыстыбаннай уонна муниципальнай былаас уорганнара киирбит сайабылыанньаны 10 үлэ күнүн иһигэр көрөн, эппиэт бэлэмниэхтэрэ. Суол быраабылатын кэһии икки ый көрүллэр. Бэрээдэги кэһиини, быраапкытын күөмчүлээһини, массыына нүөмэрин видеоҕа устан, хаартыскаҕа түһэрэн ыытыахха сөп.
Иһитиннэрии оҥорорго судаарыстыбаннай өҥө саайтын нөҥүө регистрацияланан, толору ааккытын, олорор сиргитин ыйыаххытын наада. Саайтка киирэн, эһиги кыһалҕаҕытын хайдах быһаарбыттарын, туох миэрэ ылбыттарын көрүөххүтүн сөп диэн этэллэр СӨ Инновациятын, цифровой сайдыытын уонна инфокоммуникационнай технологиятын министиэристибэтигэр.
«Наша Якутия» диэн мобильнай сыһыарыы Google Play уонна AppStore угулунна.
Марианна Тыртыкова, «Саха сирэ», edersaas.ru