Саха спортсменнара любителлэр ортолоругар саахымакка аан дойду чөмпүйэнээтигэр ситиһиилээхтик кыттыыларын түмүгүнэн Ил Түмэн пресс киинигэр көрсүһүү тэрилиннэ. Чөмпүйэнээт Италия Сполето куоратыгар ыытыллыбытын, онно 61 дойдуттан 250 саахыматчыт кыттыбытын, ХИФУ устудьуоннара, спорт маастарыгар хандьыдааттар Руслан Пахомов уонна Вилена Попова кыайыылааҕынан, оттон Туйаара Адамова призерунан буолбуттарын туһунан өссө муус устар 14 күнүгэр “Эдэр саас” сайтка Саахымат киинин инструктора Афанасий Павлов сиһилии суруйан турар.
Ил Түмэҥҥэ буолбут пресс-конференцияҕа Саха Өрөспүүбүлүкэтин саахымакка федерациятын бэрэсидьиэнэ Юрий Николаев спорт бу көрүҥүн сайдыытын туругун туһунан билиһиннэрдэ. Ол курдук, билиҥҥи туругунан өрөспүүбүлүкэҕэ ФИДЕ спордун 8 уонна ССРС спордун 1 маастардара баалларын иһитиннэрдэ. Аны билигин федерация биир сүрүн соругунан норуоттар икки ардыларынааҕы кылаастаах маастары иитэн таһаарыы буоларын санатта. Манна даҕатан эттэххэ, Руслан Пахомов ФИДЕ маастарын нуорматын толоруутугар диэри 16 очукуо хаалбыт.
Федерация бэрэсидьиэнэ саахымат сайдыытыгар кыра үбүлээһин, генеральнай спонсор суоҕун уонна үрдүк таһымнаах тренердэр тиийбэттэрин аҕынна. Рейтиннээх турнирдарга кыттарга эмиэ үбүлээһин ирдэнэр. Маннык кыһалҕалар баалларын үрдүнэн, СӨ саахымакка федерацията көхтөөх үлэни ыытар. Ол курдук, сотору кэминэн М.К.Аммосов аатынан Хотугулуу-Илиҥҥи федеральнай университет базатыгар саахымат кафедратын аһыы былааннанар. Бу түгэн саахымат курдук интеллектуальнай спорт көрүҥэ биһиги өрөспүүбүлүкэбитигэр салгыы сайдыытыгар тирэх буолара саарбахтаммат.
Пресс-конференция кэмигэр СӨ Спорка министиэристибэтин аатыттан любителлэргэ аан дойду чөмпүйэнээтигэр ситиһиилээхтик кыттыбыт Руслан Пахомовка, Вилена Поповаҕа уонна Туйаара Адамоваҕа Махтал суруктар туттарылыннылар.
Билиҥҥи туругунан ФИДЕ рейтининэн Пахомов 2284, Попова 1630, Адамова 1984 очукуолаахтар. Саахыматчыттарбыт бу ситиһииттэн уоскуйан хаалар санаалара суох. Өскөтүн Руслан Сахалиҥҥа ыытыллар турнирга ситиһиилээхтик кытыннаҕына, спорт маастарын нуорматын толорор кыахтаах. Оттон Виленалаах Туйаара сотору кэминэн Австрияҕа норуоттар икки ардыларынааҕы турнирга кыттан, рейтиннэрин үрдэтэр соруктаахтар.
Петр ПАВЛОВ, “Саха сирэ”, www.edersaas.ru
Василий Кононов түһэриитигэр: пресс-конференция түгэннэрэ.