Дьокуускайга саахымакка онлайн күрэхтэһии ыытылынна...
Дьулуур - Олох-дьаһах

Дьокуускайга саахымакка онлайн күрэхтэһии ыытылынна

Аан дойдуну аймаабыт коронавирус ыарыы тарҕанан турар кэмигэр успуор сорох көрүҥнэригэр күрэхтэһиилэр тохтооботтор.

Ол курдук, Дьокуускай куорат физическэй култуураҕа уонна успуорка управлениетын (начаалынньык Константин Бурцев) көҕүлээһининэн бу күннэргэ Дьокуускай куорат куубагар саахымакка онлайн күрэхтэһиитэ ыытылынна.

Күрэхтэһии “Шахматная планета” платформаҕа (www.chessplanet.ru) тэрилиннэ уонна “Дьокуускай коронавируһу утары!”диэн девиһинэн ыытылынна.

Күрэхтэһии швейцарскай систиэмэнэн 11 туур оонньонно. Манна туох да хааччаҕа суох, баҕалаах барыта күрэхтэстэ. Ол курдук, бу турнирга анаан-минээн эрдэттэн сайаапка биэрэн 51 саахыматчыт кытынна. Оонньуу саахымат федерациятын (ФИДЕ) быраабылатынан барда.

Күрэхтэһии кылаабынай судьуйатынан Дуобат-саахымат республикатааҕы киинин инструктора Гаврил Винокуров үлэлээтэ. Түмүккэ кыайыылаахтар быһаарылыннылар. Ол курдук, эр дьоҥҥо Денис Назаров 10 очукуолаах бастаата, Руслан Пахомов иккис, Ньургун Винокуров үһүс буоллулар. Кинилэр иккиэн 9-туу очукуоланнылар. Бу бөлөххө алта күүстээхтэр ахсааннарыгар Нариман Мустафин, Гумар Моисеев, Василий Романов киирдилэр. Көрбүккүт курдук, састаап күүстээх.

Ити курдук, кыргыттарга Арина Васильева, үөрэнээччилэргэ Никита Пестряков, дьахталларга Галина Федорова уонна бэтэрээннэргэ Александр Кравченко кыайдылар.

Балаһыанньа быһыытынан кинилэр – мэтээллэринэн, грамоталарынан уонна бириистэринэн наҕараадаланнылар. Оттон эр дьоҥҥо төрдүс-алтыс миэстэлэргэ тиксибиттэр эмиэ бирииһинэн бэлиэтэннилэр.

Ити курдук, республика дуобатчыттара уонна саахыматчыттара дьиэлэригэр олорон күрэхтэһиилэрин, эрчиллиилэрин тохтоппоттор. Кинилэргэ анаан маннык кэмҥэ күрэхтэһии тэрийэр дьоҥҥо махтал!

Дьиэҕитигэр олоруҥ! Бэйэҕитин уонна тулалыыр чугастааҕы дьоҥҥутун харыстаан! Чэгиэн-чэбдик буолуҥ!

Петр ПАВЛОВ, dzulurgan.ru саайтан. 

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

четыре × 2 =