От ыйын 20 күнэ — Аан дойдутааҕы саахымат күнэ. Бу күн 1924 сыллаахха Париж куоракка норуоттар икки ардыларынааҕы саахымат бэдэрээссийэтэ тэриллибит. Ол аата, бу сылга бэдэрээссийэ төрүттэммитэ 99 cыла. Оттон эһиил 100 сылын бэлиэтиэҕэ.
Бүгүн Дьокуускай куорат Ленин болуоссатыгар саахымат марафона буолан ааста. Оонньуон баҕалаахтар хаска баҕар кэлиэхтэрин сөп, эрдэттэн бэлиэтэнэр наадата суох. Күрэхтэһии уон дуоскаҕа, «тута көтөн» диэн баартыйанан ыытылынна. Төһө да ардахтаах күн буоллар, кыттааччы ахсаана элбэх буолан биэрдэ. Аҕам саастаах дьон, ыччат уонна оҕолор — көлүөнэ бары бэрэстэбиитэллэрэ кэлбиттэр.
Саха Өрөспүүбүлүкэтин саахымакка бэдэрээссийэ бэрэсидьиэнэ, Үүнэр көлүөнэлэр пуондаларын дириэктэрэ Владимир Егоров: «Кэлиҥҥи сылларга Саха сиригэр саахымат биллэ сайынна уонна интэриэһи тардар буолла. Эрэгийиэҥҥэ өрөспүүбүлүкэтээҕи саахымат уонна дуобат киинэ, Оҕо дыбарыаһын иһинэн Анатолий Карпов аатынан саахымат оскуолата үлэлииллэр. Өссө 1500 оҕо араас хабааннаах кулууптарга уонна куруһуоктарга дьарыктаналлар. Антон Шомоев уонна Данил Павлов гроссмейстерскай оскуолаларыгар онлайн — дьарыктар ыытыллаллар. «Шахматы — детям» өрөспүүбүлүкэтээҕи бырайыагы олоххо киллэрии үлэтэ көхтөөхтүк салҕанар. Ааспыт кыһын Ил Дархан Кубогар саахымат турнира ыытыллыбыта. Ону таһынан, СӨ үөрэнээччилэрин олимпиадатыгар саахымат композицияларын быһаарыыга олимпиада киирдэ», — диэн бэлиэтээтэ.