Аан дойдутааҕы саахымат федерациятын (ФИДЕ) саҥа быраабылатынан, билигин разряд ЭЛО рейтиннээх (коэффициеннаах) эрэ буоллаххына иҥэриллиэн сөп. Ол иһин өрөспүүбүлүкэҕэ саахыматы оонньооччулар баһыйар үгүстэрэ итинник рейтиннээх буолууларын ситиһэр сорук турар. Аҥаардас бу 2017 сылга үктэнэн баран, Өрөспүүбүлүкэтээҕи саахымат киинэ рейтинг ааҕыллар икки улахан турниры ыытта.
Афанасий Павлов, «Саха сирэ» хаһыат, www.edersaas.ru
Олунньу 10-12 күннэригэр ыытыллыбыт турнирга 10 улуустан уонна киин куораттан 60-ча маассабай разрядтаах саахыматчыт түмсэн, үс бөлөҕүнэн оонньоото. Сүрүн соруктара – квалификацияны үрдэтии уонна ЭЛО рейтини ылыы. Манна ордук үчүгэй тэрээһини уус алданнар көрдөрдүлэр. Бороҕоҥҥо кииннээн саахымат идэтийбит оскуолата тэриллиэҕиттэн, Уус Алдаҥҥа үлэ-хамнас биллэ сэргэхсийдэ. Оҕолор оонньуур таһымнара лаппа үрдээтэ. Оскуола старшай тренерэ М.И.Ушницкай бу сырыыга алта оҕону аҕалла. Үтүөлээх тренер Михаил Ильич төһөлөөх оҕону иитэн-үөрэтэн, такайан таһааран олох киэҥ аартыгар үктэннэрбитэ буолуой?
Иитиллээччилэрэ бу да түһүлгэҕэ ситиһиини аҕаллылар. Мүрү 1 №-дээх орто оскуолатын 3-с кылааһын үөрэнээччитэ Айтал Тарскай үһүс разрядтаахтар бөлөхтөрүгэр уһулуччу түмүгү көрдөрдө – 9-тан 8 очукуону ылла уонна иккис разряд нуорматын аһары толордо. Киниттэн очукуо аҥаара хаалбыт 13 саастаах Дьокуускай үөрэнээччитэ Влад Тарскай иккис миэстэлэннэ уонна эмиэ 2-с разряд нуорматын толордо.
Бастаабыт Айтал эдьиийэ Аня Тарская 6 очукуоланна (4-с миэстэ). Эмиэ Уус Алдантан сылдьар 4-с кылаас үөрэнээччитэ Сайаана Куо Рожина иккис разрядтаахтар бөлөхтөрүгэр үһүс миэстэни (6 очукуо) ылла уонна эбиитин “кыраһыабай партия иһин” анал бирииһинэн бэлиэтэннэ.
Үһүс бөлөххө икки саахыматчыт 3-с разряд нуорматын толордо. Дьокуускайтан 10 саастаах Толя Мункуев 7,5 очукуону хомуйан, эрэллээхтик бастаата. Амматтан 5-с кылаас үөрэнээччитэ Айтал Артемьев киниттэн очукуо аҥаара эрэ хаалан, иккис миэстэлэннэ. Амма оҕолоро Света Бессонова, Витя Наумов эмиэ үчүгэй өйдөбүлү хааллардылар. Мэҥэ Хаҥалас Мэлдьэхсититтэн убай-быраат Дима, Женя Колесовтар (тренердэрэ Ольга Иванова) ситиһиилээхтик кытыннылар.
Ол эрээри, саамай бастыҥ ситиһии 70 саастаах Владимир Иванович Халабышевка (Ньурба, Маалыкай) тосхойдо. Кырдьаҕас оонньооччу лоп курдук 7 очукуону хомуйан, бөлөҕөр кыайыылаах таҕыста уонна 1-кы спортивнай разряд нуорматын толорон үөрдэ-көттө.
Бу турнир улуустарга элбэх кэскиллээх оонньооччулар тахсан эрэллэрин өссө төгүл көрдөрдө.
Афанасий ПАВЛОВ, күрэхтэһии кылаабынай судьуйата, «Саха сирэ» хаһыат, www.edersaas.ru
Хаартыскаҕа: тренер Михаил Ильич Ушницкай биир бастыҥ иитиллээччитэ Ньургуйаана Баишеваны кытта.
Семен МЕСТНИКОВ хаартыскаҕа түһэриитэ.