«Саахара суох муорус…»

Бөлөххө киир:

Оҥорор былааннаахпыт диэн Мэҥэ Хаҥалас Табаҕатыгар олорор эдэр пиэрмэр Анна Герасимова үллэстэр. Кини «Агростартап» грант көмөтүнэн, айылҕаҕа үүнэр үүнээйилэртэн оҥорон таһаарар сыах арынна.

edersaas.ru

Анна кэпсииринэн, сыаҕы туттар санаа 2016 сыллаахха киирбит. «Оччолорго Ас-үөл оҥорон та­­һаарар бырамыысыланнас департаменын салайааччыта, билигин СӨ тыатын хаһаайыстыбатын ми­­ниистирин солбуйааччы Василий Афанасьевтыын сыаҕы олоххо киллэрэр туһунан кэпсэппиппит», — диэн Анна этэр.

Онно биһиги улууспут кэрэ, баай айылҕатын үүнээйилэрин туһанар туһунан кэпсэтии барбыта. Василий Владимирович бу салаа сайдар кэскиллээҕин туһунан эппитэ. Ол кэнниттэн 2019 сыл­­лаахха кэргэммин кытары сүбэлэһэн баран, «Агростартап» граҥҥа кыттарга санаммыппыт. Биисинэс-былаан оҥордубут, докумуоннары хомуйдубут. Хата ­куонкуруһу ааһаммыт, 2,9 мөлүйүөннээх граны ылбыппыт. Ол үппүтүгэр буһарар хочуол, сууйар массыына, хара­йар иһит, ууну ыраастыыр тэриллэри, үлтүрүтэр уонна бэлэм бородууксуйаны суулуур маассыыналары атыыласпыппыт. Дьокуускайтан бытыылка, этикетка сакаастаабыппыт.

Агростартап ирдэбилинэн, үс саҥа үлэ миэстэтин таһаарбыппыт. Нэһилиэк уонна оройуон  үлэһиттэрэ отон атыылаһыытыгар эмиэ субсидия көрөн көмөлөспүттэрэ. Түгэнинэн туһанан, дьаһалталарга уонна СӨ Тыатын хаһаайыстыбатын министиэристибэтигэр махталбытын тиэрдэбит, – диэн ыал ийэтэ, идэтинэн технолог Анна кэпсиир.

Анна уонна Роман Герасимовтар 2015 сыллаахтан үүт сыаҕын үлэлэтэллэр. Нэһилиэнньэттэн үүт тутаннар, сүөгэй, арыы, йогурт, кефир, быыппах оҥороллор эбит. Ону бэйэлэрин дэриэбинэлэригэр, Майаҕа, Аллараа Бэстээххэ, Дьокуускайга туттараллар.  Үүт сыаҕын кэҥэттинэннэр, муорус, сироп, барыанньа оҥорор сыаҕы тутуннулар. Билиҥҥи саҥа сыахтара бу үүт сыаҕын аттыгар сыста турар эбит.

— Билиҥҥи тэтимнээх олоххо дьон бэлэм сиробу, морсу, барыанньаны хамаҕатык атыылаһар. Уонна бу бородуукта ырыынакка аҕыйах диэммин, дьарыктанарга сананным. Биир симиэнэҕэ  400 лиитирэ бородууктаны оҥорон таһаарыахха сөп. Отону нэһилиэнньэттэн атыылаһар санаалаахпыт.  Былырыын киилэтин 300 солкуобайга атыыласпыппыт. Быйыл ­буоллаҕына, түөрт туонна бородууксуйа оҥорон таһаарар бы­­лааннаахпыт, – диэн эдэр пиэрмэр кэпсиир.

Салгыы Герасимовтар саҥа бородууксуйалары оҥорор бы­­лааннаахтар. Доруобуйаларын көрүнэр дьоҥҥо анаан, саахара суох муоруһу оҥорор туһунан толкуйдууллар эбит. Ол бырайыага өссө толкуйданар.

Василий Афанасьев, СӨ тыатын хаһаайыстыбатын миниистирин солбуйааччы:

— Уопсайынан, Саха сирин айылҕатыгар үүнэр үүнээ­йилэртэн оҥорон таһаарыы кэскиллээх дьыала дии санаабын. Атын дойдуларга да таһаарыахха сөп. Ону таһынан, отону туттаран, нэһилиэнньэ эбии харчылаһыан сөп дии.  Бу сыах арыллыыта нэһилиэк дьарык­таах буолуутугар төһүү күүс буолар. Ордук сайыҥҥы-күһүҥҥү кэмҥэ, – диэн миниистир солбуйааччыта кэпсээтэ.

Бу сыах арыллыыта Мэҥэ Хаҥалас улууһун тыатын ха­­һаайыстыбатын саҥа таһымҥа таһаарда. Улуустарга саҥа са­­лаалар үлэҕэ киирэллэрэ наһаа үчүгэй дии. Эдэр пиэрмэр саҥа саҕалааһыныгар ситиһиилэри баҕарыахха, былааннара барыта туоллун, үлэтэ кэҥээн истин.

Бэлиэтээн этэр буоллахха, «Агростартап» грант «Пиэр­мэрдэргэ көмө систиэмэтэ, тыа хаһаайыстыбатын сайдыыта» бырайыак иһинэн үлэлиир. Өрөспүүбүлүкэҕэ 2019 сылтан 75 саҥа саҕалааччы пиэрмэр бу көмөнөн туһаммыт. Онон, эн эмиэ тыа хаһаайыстыбатынан дьарыктанар баҕалаах буоллаххына,  бу грант куонкурсугар кыттыаххын сөп.

Виктория Бястинова, «Саха сирэ» хаһыат, edersaas.ru

Хаартыскалар Анна Герасимова архыыбыттан. 

+1
0
+1
0
+1
0
+1
0
+1
0
+1
0
+1
0