Саахалланар туруктаах дьиэлэртэн көһөрүү саҥа федеральнай бырагыраама Саха сириттэн саҕаланыаҕа
СӨ Ил Дархана Егор Борисов Москваҕа РФ тутуутун уонна дьиэ-уот, коммунальнай хаһаайыстыбатын миниистирэ Михаил Мени кытта көрүстэ.
edersaas.ru
Сүбэ мунньах саҕаланыытыгар Егор Борисов өрөспүүбүлүкэҕэ дьиэ-уот тутуутун туһунан кылгас иһитиннэриини оҥордо. Олорор дьиэни тутууга биһиги өрөспүүбүлүкэбит Уһук Илин эрэгийиэнигэр иккис миэстэҕэ сылдьар. Бу ыйдааҕы туругунан, Саха сиригэр 533,5 тыһ. кв.миэтэрэ иэннээх олорор дьиэ тутулунна. Маны таһынан социальнай суолталаах эбийиэктэри тутуу эмиэ былаан быһыытынан ыытыллар.
«2013 – 2017 сылларга саахалланар туруктаах дьиэлэртэн көһөрүү» федеральнай бырагыраамаҕа олоҕуран, 29127 киһи көһөрүлүннэ. Былаан 97,31% туолла.
2012 сыл кэнниттэн саахалланар туруктаах дьиэ статуһун ылбыт дьиэ ахсаана эмиэ элбээтэ. Ону туоратыыга 80 млрд. солк. үп-харчы наада. Федеральнай бырагыраама үлэтин болдьоҕо түмүктэнэн, РФ Бэрэсидьиэнэ Владимир Путин сорудаҕынан бу үлэ салгыы 2019 сылтан ыытыллыахтаах.
– Өрөспүүбүлүкэ бүддьүөтэ төһө да дефициттээх таҥылыннар, бу сыалга анаан 2018 сылга 500 сөл. солк. аттардыбыт. Онон федеральнай бырагыраамаҕа саҥа уларытыылары киллэрэн баран, биһиги эрэгийиэммитин пилотнай бырайыак быһыытынан киллэрэргитигэр этиилээхпин, – диэн Егор Афанасьевич этии киллэрдэ.
Онуоха, федеральнай миниистир Михаил Мень өрөспүүбүлүкэ үрдүк көрдөрүүлэрин учуоттаан туран, Егор Борисов этиитин ылынна уонна пилотнай бырайыагы олоххо киллэриигэ анал хамыыһыйа тэрийэр туһунан эттэ.
Маны таһынан Ил Дархан эдэр ыаллар олорор дьиэнэн хааччыллыыларын боппуруоһун көтөхтө. Чуолаан, социальнай төлөбүр быраабылаларыгар уларытыылары киллэрэр туһунан эттэ.
Анивера АКИМОВА, «Саха сирэ» хаһыат, edersaas.ru