Ахсынньы 19 күнүгэр РФ Оборонаҕа министиэристибэтин сөмөлүөтэ Булуҥҥа быһылааҥҥа түбэспитигэр Саха сирин эмчиттэрэ дьоруойдуу быһыы холобурун көрдөрдүлэр.
Надежда Егорова, «Саха сирэ», https://edersaas.ru/
Сөптөөх көмө оҥоһулунна
Саахал медицинатын өрөспүүбүлүкэтээҕи киинин салайааччыта Владимир Сотников быыс булан, комментарий биэрдэ:
– Булуҥ улууһугар РФ Оборонатын минисӨиэристибэтин сөмөлүөтэ саахалламмытын туһунан иһитиннэрии биһиги диспетчербитигэр олохтоох бириэмэнэн 12 ч. 10 мүн киирбитэ. Мин ыксаллаах быһыы-майгы тахсыбытын тута СӨ доруобуйа харыстабылын миниистирэ Михаил Охлопковка биллэрбитим. Ону сэргэ эмсэҕэлээбиттэр туруктарынан көрөн бөлөхтөргө араартыыр биригээдэни тэрийэргэ Булуҥ улууһугар баар салаабытыгар дьаһал биэрбитим. Икки быраастан уонна икки фельдшертэн турар биригээдэ бөртөлүөтүнэн аҕалыллыбыт 17 байыаннайы, бастакы бөлөҕү көрсүбүтэ. 9 киһилээх иккис бөлөҕү Булуҥ улууһун киин балыыһатын быраастарын кытары биһиги бөртөлүөппүт аҕалбыта. Бу кэмҥэ миниистир Михаил Охлопков сорудаҕынан Дьокуускайга элбэх профиллаах медицинскэй анал биригээдэ суһаллык хомулла охсубута. Биригээдэҕэ иккилии нейрохирург, уопсай быраактыка хирура, травматолог, анестезиолог уонна фелдьшер киллэриллибиттэрэ.
Маны сэргэ Булуҥ киин балыыһатыгар эмсэҕэлээбиттэри сытыарар 38 куойканы бэлэмнии охсубуттара. Дьокуускай к. сүрүн балыыһаларын исписэлиистэрэ аныгы телемедицинскэй аппаратура көмөтүнэн Булуҥ Киин балыыһатын быраастарыгар, ол иһигэр биһиги салаабыт үлэһиттэригэр, сүбэни-аманы биэрэ олорбуттара. Лаптевтар муораларын кытылыгар сытар Булуҥ улууһугар сөмөлүөт көппөт күнэ-дьыла туран, байыаннай медиктэр уонна быыһааччылар саахал тахсыбыт сиригэр кыайан тиийэр кыахтара суоҕа. Дьолго, Саахал медицината, Булуҥнааҕы киин балыыһа, СӨ Доруобуйа харыстабылын министиэристибэтэ түмсүүлээхтик дьаһананнар уонна лүөччүктэр идэлэрин таһымнара үрдүк буолан, эмсэҕэлээбит дьон бары Тиксии бөһүөлэгин балыыһатыгар аҕалыллыбыттара. Онтон элбэх профиллаах медицинскэй биригээдэ Булуҥ улууһугар анал көмөнү оҥоро бириэмэтигэр тиийэн кэлбитэ.
Улууска күн-дьыл туруга мөлтөөн, күүстээх тыал түһэн уонна көстүү мөлтөх буолан, сөмөлүөттэр бөһүөлэккэ тиийэр кыахтара суоҕа. Ол да буоллар, биһиги кылгас кэм иһигэр анал биригээдэни тириэрдэри ситиспиппит. Тиксии бөһүөлэгиттэн ыаллыы сытар Усуйаана улууһун Уус Куйга бөһүөлэгэр биһиги салаабыт «МИ-8» бөртөлүөтэ көппүтэ. Онтон Дьокуускайтан Уус Куйгаҕа Саахал медицинатын киинин «МИ-8» бөртөлүөтүнэн элбэх профиллаах биригээдэ үрдүк таһымнаах быраастара көппүттэрэ.
Онон, биһиги исписэлиистэрбит күнү-дьылы «албыннаан», Булуҥнааҕы киин балыыһаҕа хойутаабакка тиийбиттэрэ, – диэн Владимир Сотников кэпсээтэ.
Министиэристибэ хонтуруолга ылла
СӨ доруобуйа харыстабылын миниистирин бастакы солбуйааччы Олег Припузов:
– Биһиги исписэлиистэрбит суһаллык дьаһаннылар. Саахал медицинатын өрөспүүбүлүкэтээҕи киинин үлэтин регламенынан, кылгас болдьоххо эмсэҕэлээбит дьоҥҥо анал медицинскэй көмө бары көрүҥэ оҥоһулунна. Ол иһигэр, уустук эпэрээссийэлэр (икки нейрохирургическай уонна биир торако-абдоминальнай) оҥоһулуннулар. Сөмөлүөт көппөт халлаана бүрүүкээн, Арассыыйа Ыксаллаах быһыыга-майгыга министиэристибэтин исписэлиистэрэ кэлэ иликтэринэ биһиги үлэһиттэрбит бэйэлэрин күүстэринэн тустаах көмөнү оҥордулар. Онуоха наадалаах аныгы эмтиир аппаратура уонна эмтэр бааллар. Инникитин, эмсэҕэлээбиттэри өрөспүүбүлүкэтээҕи эбэтэр федеральнай клиникаларга тириэрдиэххэ наада. Балаһыанньаны СӨ Доруобуйа харыстабылын министиэристибэтэ хонтуруоллуур», – диэн Саха сирин эмчиттэрин уустук усулуобуйаҕа суһал дьайыыларын уонна үлэлэрин үрдүктүк сыаналаата.
Саха сирин үрүҥ халааттаах аанньаллара түмсүүлээх үлэлэринэн итиэннэ тыйыс тымныыны, күн-дьыл уустук усулуобуйатын тулуйан, туундара ортотугар быһылааҥҥа түбэспит саллааттарга, байыаннай сөмөлүөт экипаһыгар толору уонна сөптөөх көмөнү оҥордулар. Байыаннайдар быыһаннылар.
Улуустааҕы киин балыыһалары (ол иһигэр, «узкай» идэлээх быраастардаах) уонна Арктика оройуоннарыгар санитарнай авиация базатын оннунан хаалларбыт буолан, Саха сирин эмчиттэрэ хаһан баҕарар тахсыан сөптөөх быһылааннарга, алдьархайга суһал көмөнү үрдүк таһымнаахтык оҥорор кыахтаахтарын тоһоҕолоон бэлиэтиэххэ наада.
Назар АММОСОВ, Надежда ЕГОРОВА, edersaas.ru