Дьокуускайга нарколог уонна психиатр быраастартан ыспыраапкалары хантан ылыахха сөбүн уонна тоҕо уочарат үөскээбитин туһунан дьон элбэхтик ыйыталаһар. Наркология өрөспүүбүлүкэтээҕи диспансера быһаарарынан, кулун тутар 1 күнүттэн РФ Доруобуйа харыстабылыгар министиэристибэтин бирикээһинэн нарколог уонна психиатр быраастартан ыспыраапкалары ылыы быраабылаларыгар кэккэ уларыйыылар киирбиттэр.
Ол иһигэр, урут суоппардыыр бырааптара быһыллыбыт дьон уонна саа сэбин-сэбиргэлин туһанарга ыспыраапка ылалларыгар икки анаалыһы (ол иһигэр иик эмиэ) туттараллар.
Ону сэргэ, психолог 91 ыйытыыттан турар тургутукка (тест) эппиэттииллэр. Онон, биир киһиэхэ ортотунан 40-ча мүнүүтэ барар.
Суоппардарга ыспыраапканы биэрэр быраастар арыгылааһыҥҥа уонна наркотигы туһаныыга уорбалыыр киһилэрин, онтон сылтаан массыына ыытар кыаҕа суохтарын бэйэлэрэ быһаараллар. Ол иһин итинник дьону уонна урут массыынаны итирик туруктаах сылдьан бырааптара быһыллыбыттар эбэтэр мэдиссиинискэй чинчийииттэн аккаастанар дьону эбии химико-токсикологическай чинчийиигэ ыыталлар. Ол иһин мэдиссиинискэй көрүү бириэмэтэ уһаан биэрдэ.
Уочарат үөскүүрүн өссө биир төрүөтэ — өрөспүүбүлүкэбит үгүс улуустарыгар килиниичэскэй психологтар суохтар. Нэһилиэнньэ ыспыраапка ылаары суол сабыллыан иннинэ тоҕо анньан кэллэ.
Ол иһин, диспансер салалтата ыспыраапканы хас да сиринэн бэриллэрин курдук усулуобуйаны тэрийбитэ, быраастар көрөр бириэмэлэрин уһатан биэрбитэ.
Онон, нэһилиэнньэ наадыйар ыспыраапката чопчу ханнык аадырыска бэриллэрин билэн баран кэлиэн наада.
Наркология өрөспүүбүлүкэтээҕи диспансерын подразделениеларыгар тустаах ыспыраапкалары маннык аадырыстарга тиийэн ылыахха сөп:
Автодорожнай уулусса 38 №-дээх дьиэтигэр профосмотр отделениетыгар (бэнидиэнньиктэн бээтинсэҕэ диэри 8.30-15.45 чч.) маннык ыспыраапкалар бэриллэллэр:
— массыына ыытарга,
— саа сэбигэр көҥүлү ыларга,
— ЧОП үлэһиттэригэр,
— омук гражданнарын доруобуйаларын бэрэбиэркэлииргэ (8.30-15.30 чч.).
Киров уулуссатын 21 №-дээх дьиэтигэр (8.00-15.00 чч.)
— массыынаны ыытарга,
— үлэҕэ киирэргэ,
— эппиэкэ уорганнарыгар
— омук гражданнарын доруобуйаларын бэрэбиэркэлииргэ.
Стадухин уулуссатын 81 №-дээх дьиэтигэр (8.30-15.45 чч.):
— массыына ыытарга,
— омук гражданнарын доруобуйаларын бэрэбиэркэлииргэ,
— үлэҕэ киирэргэ,
— эппиэкэ уорганнарыгар,
— байыаннай-быраас хамыыһыйаларыгар.
Петр Алексеев уулуссатын 83/18 А дьиэтигэр (8.30-15.45 чч):
— массыынаны ыытарга,
— үлэҕэ киирэргэ,
— эппиэкэ уорганнарыгар.
Бэйэҕитин кытары илдьэ кэлэр докумуоннаргыт – пааспар, СНИЛС, ИНН (саа сэбин туһанарга көҥүлү биэрэр ыспыраапкаҕа булгуччулаах), ФЛГ (ЧОП үлэҕэ киирэргэ булгуччулаах).
Мунаарар ыйытыыларгытын үлэ кэмигэр 89248980435 нүөмэргэ эрийэн билсиҥ. Ыспыраапка барыта төлөбүрдээх.
Салгыы аналыыска хайдах бэлэмнэнэр туһунан эмиэ суруйуохпут.
Надежда ЕГОРОВА, «Саха сирэ», edersaas.ru
Чокуур Гаврильев хаартыската