Саҥа дьыл өрөбүллэригэр быһыыны биэрии тохтуо суоҕа

Бөлөххө киир:

Саха Өрөспүүбүлүкэтин Ил Дархана Айсен Николаев Саҥа дьыллар өрөбүллэригэр быһыыны ылыыны тохтоппот соругу туруорда.

Роспотребнадзор управлениетын чахчыларынан, ахсынньы 28 күнүнээҕи туругунан коронавирустан быһыы бастакы компоненын 522 928 киһи, өрөспүүбүлүкэ улахан дьонун 73% ылла. Онтон 88 534  киһи ревакцинацияны ааста.

«Билигин биһи сорукпутунан бырааһынньык күннэригэр үлэни сөптөөхтүк тэрийии буолар. Быһыыны ылыы тиэмпэтэ намыраабатын туһугар доруобуйа харыстабылын тэрилтэлэригэр быһыыны биэрэр пууннар өрөбүлэ суох үлэлиэхтээхтэр. Ону таһынан эмт-том саппааһын, куойка саппаас пуондатын хааччыйарга, куораттарга уонна оройуоннар кииннэригэр  хааччахтааһын миэрэлэрин уонна санитарнай ирдэбиллэри тутуһууну бэрэбиэркэлиир административнай хамыыһыйалар үлэлэрин күүһүрдэргэ улахан болҕомтону ууруохха наада», -– диэн  Айсен Николаев өрөспүүбүлүкэтээҕи суһал штаб мунньаҕар иһитиннэрдэ.

СӨ доруобуйа харыстабылын миниистирэ Лена Афанасьева биллэрбитинэн, өрөспүүбүлүкэ мэдиссиинискэй тэрилтэлэригэр эмп саппааһа хааччылынна, бырааһынньык күннэригэр суһал ыҥырыыларга үлэлииргэ «суһал көмө» дьуһуурунай биригээдэлэрэ күүһүрдүллүөхтэрэ. Быһыы биэрэр пууннар, учаастактар сулууспалара уонна лабораториялар тиһигин быспакка үлэлиэхтэрэ.

Ил Дархан Өрөспүүбүлүкэтээҕи суһал штаб сыллааҕы көхтөөх үлэтин бэлиэтээтэ уонна махтанна.

Надежда ЕГОРОВА, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0