Бүгүн, бэс ыйын 30 күнүгэр Дьокуускайга “Саһарҕа хоптото” эдэр мусукааннар норуоттар икки ардыларынааҕы I аһаҕас куонкурустара саҕаланна.
Суорун Омоллоон аатынан Опера уонна балет тыйаатырыгар күнүс 11 чаастан куонкуруһу үөрүүлээхтик аһыы сиэригэр-туомугар сааланы толору киһи мустубут. Манна араас дойдулартан – Соҕуруу Кэриэйэттэн, Кытайтан, Японияттан, АХШ-тан, Арассыыйа куораттарыттан – Москваттан, Санкт-Петербургтан, Владивостоктан тиийэ уонна, биллэн турар, Саха Өрөспүүбүлүкэтин араас улуустарыттан, Дьокуускай куораттан куонкурус кыттыылаахтара, дьүүллүүр сүбэ чилиэттэрэ бааллар.
Бу, » Муусука барыбытыгар: норуоттар икки ардыларынааҕы маастар-кылаастартан — норуоттар икки ардыларынааҕы куонкурустарга» III кэнгириэс чэрчитинэн ыытыллар «Саһарҕа хоптото» («Розовая чайка») норуоттар икки ардыларынааҕы I аһаҕас куонкурус «Муусука барыбытыгар» бырайыак саҕаламмыта 5 сылыгар, В.А.Босиков аатынан Муусука үрдүкү оскуолата төрүттэммитэ 25 сылыгар ананар. Онон, эппиэтинэс хас да бүк улахан.
Үөрүүлээх тэрээһин иннинэ тыйаатыр иннигэр өрөспүүбүлүкэ оскуолаларын холбоһуктаах хордара ыллаата, оттон Доҕордоһуу болуоссатыгар Муусука үрдүкү оскуолатын, 21-с оскуола, Чурапчытааҕы оҕо искусствотын оскуолатын, уо.д.а. духобуой аркыастырдара кыттыылаах парад-марш буолла.
“Саһарҕа хоптото” эдэр мусукааннар норуоттар икки ардыларынааҕы I куонкурустарын аһыыга Тэрийэр кэмитиэт бэрэссэдээтэлэ, СӨ Судаарыстыбаннай сүбэһитэ, Арассыыйа норуодунай артыыһа, биллиилээх режиссер Андрей Борисов, СӨ Бырабыыталыстыбатын Бэрэссэдээтэлин солбуйааччы Ольга Балабкина, Мусукаалынай үөрэхтээһин аан дойдутааҕы уопсастыбатын вице-бэрэсидьиэнэ, илиҥҥи Вашингтон (АХШ) университетын профессора, куонкурус дьүүллүүр сүбэтин бэрэссэдээтэлэ Шейла Вудвард тыл эттилэр. Бу күн СӨ муусукаҕа педагогтара судаарыстыбаннай наҕараадалары туттулар.
Андрей БОРИСОВ, Тэрийэр кэмитиэт бэрэссэдээтэлэ:
—Бүгүҥҥү үтүө күнүнэн – муусука кэрэ бырааһынньыгынан барыгытыгар истиҥ эҕэрдэ! Бу – олус улахан суолталаах, ураты сабыытыйа, тоҕо диэтэххэ, бу сыллар тухары биһиги өрөспүүбүлүкэбит олус көхтөөхтүк, ис дууһатыттан кыһаллан, “Муусука — барыбытыгар” бырайыагы сайыннаран, Саха сиригэр бүттүүнүгэр эрэ буолбакка, Арассыыйа, аан дойду таһымыгар тиийэ таһаарда. Ону бу норуоттар икки ардыларынааҕы III кэнгириэс, “Саһарҕа хоптото” I куонкурус чаҕылхайдык туоһулууллар.
Ольга БАЛАБКИНА, СӨ Бырабыыталыстыбатын Бэрэссэдээтэлин солбуйааччы:
—Саха Өрөспүүбүлүкэтин Аҕа баһылыга Айсен Николаев, Саха Өрөспүүбүлүкэтин бырабыыталыстыбатын ааттарыттан, норуоттар икки ардыларынааҕы бүгүҥҥү кэрэ-бэлиэ сабыытыйанан эҕэрдэлиибин! “Саһарҕа хоптото” – бу, биһиги хотугу тыйыс айылҕабытын, Арктиканы, тапталлаах дойдубутун сөбүлээн олохсуйбут кыракый көтөр Саха сириттэн Гренландияҕа тиийэ көтөр. Ол аата, биһиги “Саһарҕа хоптото” куонкуруспут аан дойдуга барытыгар тиийиэҕэ. Ол аата бу куонкурус инникилээх, кэскиллээх!
Шейла Вудвард, Дьүүллүүр сүбэ бэрэссэдээтэлэ:
—Мин дириҥник махтанабын Саха Өрөспүүбүлүкэтин I Бэрэсидьиэнигэр, “Муусука — барыбытыгар” бырайыагы көҕүлээччи Михаил Ефимович Николаевка. Кини барытын эрдэттэн өтө көрөр, норуотун дьиҥнээх духуобунай лиидэрэ буолар! Кини, чуолаан духуобунай сайдыы өй-санаа сайдыытыгар аҕаларын чопчу билэр. Мин эһиэхэ, Муусука аан дойдутааҕы холбоһугун аатыттан истиҥ эҕэрдэни тиэрдэбин. Мусукаалынай үөрэхтээһини ситиһиилээхтик сайыннарыыны сэргэ, бэйэҕит өбүгэлэргит этническэй муусукаларын салгыы харыстааҥ уонна сайыннарыҥ!
ХХХ
“Саһарҕа хоптото” норуоттар икки ардыларынааҕы куонкуруһу аһыы иккис түһүмэҕэр “Symphonica ARTika” симфоническай оркестр уонна Саха сирин Филармониятын хорун (дирижер Кристиан Делисо. Италия) кэнсиэрэ буолла.
Кэнсиэргэ “Голос.Дети” Арассыыйа тэлэбиидэнньэтин I ханаалын куонкуруһун кыайыылааҕа, Саха сириттэн төрүттээх талааннаах эдэркээн ырыаһыт Валерий Кузаков кыттыыны ылла.
Татьяна МАРКОВА.