Аҕыйах хонуктааҕыта СӨ Ил Дархана Айсен Сергеевич Николаев ыйааҕынан Үөрэх уонна наука миниистирин эбээһинэһин толорооччунан Михаил Сивцев анаммыта.
Бу күннэргэ өрөспүүбүлүкэ биллэр-көстөр дьоно саҥа анааһыҥҥа бэйэлэрин санааларын биллэрэллэр. Ол курдук, СӨ Ил Түмэн Судаарыстыбаннай мунньах наукаҕа, үөрэххэ, култуураҕа, сонуну киэҥник тарҕатар сириэстибэлэргэ уонна уопсастыбаннай тэрилтэлэр дьылаларыгар сис кэмитиэтин бэрэссэдээтэлэ Феодосия Габышева:
— СӨ Ил Дархана Айсен Сергеевич Николаев ыйааҕынан, тутаах дуоһунаска олорбут Владимир Егоров оннугар СӨ үөрэҕин уонна наукатын миниистирин эбээһинэһин толорооччунан Михаил Сивцев ананна.
Анааһын саайтарга уонна социальнай ситимнэргэ ырытыыны таһаарбыта уопсайынан үөрэх систиэмэтэ аһаҕаһын уонна нэһилиэнньэ үгүс араҥатын таарыйарын туоһулуур.
Михаил Сивцев эбээһинэһи толоруутун судургута суох, үөрэх систиэмэтэ тас түгэн күүстэринэн балысханнык уларыйар, саҥа барылы, өйдөбүлү ылынар кэмҥэ саҕалыыр. Үлэни туохтан саҕалыахха сөбүй? Утумнааһынтан. Сөптөөх үлэни аттарар инниттэн, министиэристибэ үлэтигэр туруктаах үтүө түмүккэ туһаайыллар дириҥ ырытыыны ыытар наада. Ону тэҥэ, чугастааҕы ыйдарга былаас бары араҥатын, чопчу көҕүлээһиннэргэ уонна бырайыактарга уопсастыбаннай институттары кытта таһаарыылаах кэпсэтиини уонна сыһыаннаһыыны Михаил Петрович олохтуура табыгастаах буолуо.
Чугаһынан кэккэ суолталаах боппуруостар ыйыллаллар: судаарыстыбаннай түмүктүүр аттестацияны ыытыы уонна орто анал, үрдүк үөрэхтэр тэрилтэлэригэр ылыы; дистанционнай үөрэх быраап өттүнэн уонна нормативнай хааччыйыытын оҥоруу статуһун ыйыы; оҕолор сайыҥҥы сынньалаҥнара, саҥа үөрэх дьылыгар бэлэмнэнии, уо.д.а. Онтон уһун кэмнээх соруктар туһунан эттэххэ, “Образование, открытое в будущее” СӨ үөрэҕи көҕүлээһинэ-2030 (Образовательная инициатива-2030 РС(Я), “Үөрэх”, “Наука” национальнай бырайыактары, СӨ Ил Дархана Саха сиригэр үөрэҕи сайыннарыы стратегическай хайысхаларыгар, чуолаан, үөрэх хаачыстыбатынан Арассыыйаҕа 15 бастыҥ субъект ахсааныгар киирэр ыйааҕын кытта быһаччы сибээстээх. Оттон хаачыстыба, биллэрин курдук, академическай билиинэн, иитиинэн, саҥа компетенцияларынан кэмнэнэр.
Сотору кэминэн информационнай систиэмэ архитектуратын, биирдиилээн үөрэх, идэлээх үөрэхтээһин курдук уларыта тутуулары көрүөхпүт, кыттыахпыт. Бу курдук айымньылаах хаамыыны салайарга дириҥ билии, күүстээх үлэ, салайар уопут, олоххо күүс ирдэнэр. Бу барыта Михаил Петрович Сивцевкэ толору баар. Ити этиллибит барыта түмүллэн, Саха Өрөспүүбүлүкэтигэр үөрэх уонна наука тэтимнээхтик сайдалларыгар эрэл үөскүүрүгэр тирэх буолар, — диэн үгүс уопуттаах салайааччы санаатын үллэстэр.
Михаил Петрович профессиональнай үөрэх саҥа ыстандаартын, кылгас бырагыраамаларын киллэрбит, Ресурснай үөрэҕи сайыннарар профессиональнай киин үлэтин салайбыт уонна федеральнай үөрэх тэрилтэтин салаатыгар үлэлээбит уопуттаах диэн ыйар.
edersaas.ru