Бэлиитикэ Сүрүн

Саҥа Ыйаах: 2032 сылга диэри Дьокуускай сайдыыта торумнанна

Бүгүн Дьокуускай куораттааҕы Думатын 31 (уочараттаах) сессията буолла. Сессияҕа өрөспүүбүлүкэ Ил Дархана Айсен Николаев кытынна.

Сессияҕа куорат сайдыытын дьоһун суолталаах боппуруоһа көрүлүннэ. Ил Дархан “Дьокуускай куорат – Саха Өрөспүүбүлүкэтин киин куоратын 2032 сылга диэри сайдыытын туһунан” Ыйаахха илии баттаата. Бу Ыйаах Дьокуускай куорат тирэхтээх сайдыытыгар ананар. Манна Ирбэт тоҥҥо турар куоракка дьон олороругар дьоһун усулуобуйа тэриллиэхтээх, куттала суох буолуохтаах, айар куттаах сырдык санаалаах дьон олорор куоратын аатын аан дойдуга билиэхтээхтэр диэн санаанан салайтараллар. Уонна куорат тэриллибитэ 400 сылыгар ананар.

Маныаха ыйаахха Саха Өрөспүүбүлүкэтин Бырабыыталыстыбата (Тарасенко А.В.) уонна “Дьокуускай куорат” (Григорьев Е.Н.) бастакы уочараттаах тэрээһиннэри олоххо киллэриэхтээхтэрэ ыйылынна: кыбаарталлары тутууга сөптөөх архитектурнай былаан торумнаныахтаах. Куорат эйгэтэ эстетическэй көрүҥнээх буолуохтаах. Дьон харгыһа суох сылдьалларыгар усулуобуйа олохтонуохтаах. Нэһилиэнньэ доруобуйатын туругунан кыайан сылдьар кыаҕа суох араҥатыгар сөптөөх усулуобуйа тэриллиэхтээх.

Куорат күөҕүнэн симэниэхтээх, ону сөптөөхтүк көрүөхтээхтэр-истиэхтээхтэр. Өлүөнэ кытылыгар уонна куорат иһигэр баар уулаах сирдэр тастарыгар сынньанарга сөптөөх сирдэр баар буолуохтара.

150 кыбаартал иһинээҕи уонна 300 тиэргэн сирин-уотун тупсаҕай оҥоруохтара. Аныгы куорат саҥа киинин кэнсиэпсийэтэ олоххо киириэхтээх.

”Мас Дьокуускай. Аппа уҥуор” 2 №-дээх харыстанар түөлбэни  сайыннарыы көрүллэр. Манна урбааны сайыннарыыга, норуот оҥоһуктарыгар суолта бэриллиэҕэ.

Уу сүүрэр ханаала ыраас буолуохтаах. Кытылы бөҕөргөтөр үлэ ыытыллыахтаах. Тулалыыр эйгэни бөх-сыыс толоруо, киртитиэ суохтаах, онуоха бөҕү-сыыһы арааран тутуу тэриллиэхтээх.

Ирбэт тоҥ усулуобуйатыгар дьиэлэргэ инженернэй өттүнэн куттал суоһуо суохтаах.

2032 сылга саахалланар туруктаах элбэх кыбартыыралаах мас дьиэлэртэн толору көһөрөн бүтэриэхтээхтэр.

Дьон олорор кыбаарталларыгар уонна дьоҕус оройуоннарга гаас киириэхтээх. Дьокуускай уулуссалара толору 100 бырыһыан сырдык буолуохтаахтар.

2023 сылга бөҕү харайар саҥа полигон үлэҕэ киириэхтээх.

2026 сылга диэри уопсай үөрэхтээһин тэрилтэлэригэр 17 тыһыынча саҥа үөрэх миэстэтэ тэриллиэхтээх. 20 тыһыынчаттан итэҕэһэ суох саҥа үлэ миэстэтэ арыллыаҕа. Маныаха куорат дьоно экэниэмикэ креативнай уонна сервиснэй кииннэригэр үлэлиир буолуохтара.

Ыйаахтан кылгастык кэпсээтэххэ итинник. Дьокуускай куорат 2032 сылга диэри бу Ил Дархан Ыйааҕар олоҕуран сайдыахтаах. Онон Бырабыыталыстыбаҕа уонна куорат дьаһалтатыгар сүрдээх улахан эппиэтинэс сүктэрилиннэ.

Бэлэмнээтэ Женни Стрюкова.

Хаартыскалар — Ил Дархан инстаграмыттан.

0
0