Бүгүн, олунньу 16 күнүгэр, астрологтар бэлиэтииллэринэн бары өттүнэн аптаах түүн.
edersaas.ru
Ол курдук, бастакынан, бүгүн Илиҥҥи Саҥа дьыл — Ыт сыла дьэ «сокуоннайдык» бэйэтин «былааһын» ылар күнэ. Иккиһинэн, саҥа ый үүнэр күнэ. Онон баҕа санаа туоларыгар бары сиэри-туому, быраабыланы тутуһар күн. Ол эбэтэр астрологтар бэлиэтииллэринэн, сыта-олоро толкуйдаан, «Баҕа санаа картаатын» толорорго саамай тоҕоостоох өрөбүл күннэр үүннүлэр. Итэҕэйиҥ-итэҕэйимэҥ, ол эрээри үгүс киһи кумааҕыга бэйэтин баҕатынан араас хартыынаны оҥорон истиэнэтигэр ыйаабыта, ол баҕа санаата хайаан да туолбутун истибит буолуохтааххыт. «Муора» диэтэххэ — муора, «дьиэ» диэтэххэ — дьиэ, «саҕынньах» диэтэххэ — саҕынньах. Ол быыһыгар тапталын да булааччы баар, массыына да атыылаһааччы, үлэ да булааччы үгүс. Оттон харчы туһунан этэ да барбаккын.
Дьэ, онон күүстээх үлэ нэдиэлэтин кэнниттэн сынньана таарыйа, «Баҕа санаа каартатын» оҥостуҥ. Наһаа баҕарар киһиэхэ, ол санаата туолара чахчы. Онно биһиэхэ көмөлөһүөҕэ «Баҕа санаа каартатын» оҥорон, олоҕор бэрт үгүһү ситиспит суруналыыс Вероника Александрова-Эрэлкээнэ.
— Мин «Баҕа санаа каартатын» хайдах оҥорору аан бастаан ютубка биир астролог кэпсээбитин көрөн оҥостубутум. Онтон Тэрис «Айыы суола» кинигэтин ааҕан баран, биһиги, сахалар, дьылҕабытын оҥостор халандаарбытыгар олус майгыннаппытым. Ол иһин астролог уонна Тэрис үөрэтиилэринэн «Баҕа санаа каартатын» оҥостубутум. Арай ол баҕа санааларым кыралаан туолан барбыттарыттан сөхтүм. Онтон сыыйа дьүөгэлэрим, доҕотторум үтүктэн барбыттара. Билигин бу «Баҕа санаа каартата» үгүс дьоҥҥо туһалыы сылдьар, — диэн кэпсэтиибитин саҕалыыр Вероника-Эрэлкээнэ.
«Баҕа санаа каартатын» хаһаайката этэринэн, үгүс дьон санаалара түбэһиэх араас ойууну сыбыыллара, туолбата эмиэ баар эбит.
— Каарта ортотугар хайаан да «Доруобуйа» (Иэйэихсит) миэстэтэ баар буолуохтаах. Ол эбэтэр доруобуйаҥ туруга ис уоргаҥҥын кытта ыкса сибээстээх. Аскын тарҕатааччы — оһоҕос. Онон киһи доруобуйата иһиттэн — оһоҕостон саҕаланар. Каарта бу миэстэтигэр саамай табыллыбыт хаартыскаҕын сыһыараҕын. Бу тула доруобуйаҕа сыһыаннаах ойуу (ким йоганы, ким хайыһары, ким скандины) ыйыыр. Каарта саамай үрдүгэр баар килиэккэ — Дьөһөгөй Айыы. Манна саамай баҕарар баҕа санааҥ ойуутун сыһыараҕын (үп-харчы, саҕынньах, дьиэ). Онтон кэлэр килиэккэ — Одун Хаан Айыы. Бу — айар кутуҥ. Ол эбэтэр туох баар бырайыагыҥ, идиэйэҥ, быһата, олоххо киллэриэхтээх толкуйуҥ ойуута. Онтон — Билгэ Хаан. Тугу баҕарарыҥ барыта (массыына, ыраах айан, муора). Айыыһыт Айыы миэстэтигэр дьахтар уонна эр киһи сыһыана (эр-ойох буолуу, тапталы чиҥэтии, оҕо төрөөһүнэ). Манна сыһыаннаах ойууну сыһыаран кэбиһэҕин. Онтон салгыы килиэккэлэргэ тугу баҕараргын сыыйа толорон иһэҕин. Ол курдук, үлэҕэр табыллыыҥ, дуоһунаһыҥ улаатыыта, хамнаһыҥ эбиллиитэ…— диэн кэпсиир Вероника Александрова.
Кини «Баҕа санаа каартатын» типографияҕа анаан сакаастаан оҥотторбут эбит уонна ким баҕалаахха маастар-кылаас ыытар. Оо, баҕа санаа элбэх бөҕө буоллаҕа! Уонна бэйэтин уопутугар, маны барытын ааспыт киһи кэпсиирэ быдан ылыннарыылааҕа чахчы.
Кистээбэккэ эттэххэ, мин ким хайдах сатыырынан «Баҕа санаа каартатын» оҥорбутун уонна онтулара туолбутун туһунан элбэхтэ истэн, көрөн, итэҕэйэн турабын. Бу «докумуон» быраабылата биир — эн өрүү көрөр сиргэр туруохтаах. Ол эбэтэр эн баҕа санааҥ туолуутун «чугаһатан» иһэҕин.
Дьэ, онон, доҕоттор, ким итэҕэйэр итэҕэйиҥ, ким итэҕэйбэт, мичээрдээт, ааҕан эрэ кэбиһиҥ. Ол эрээри биири өйдөөҥ: бүгүҥҥүттэн саҥа ый тахсар кэмин устата «Баҕа санаа каартатын» оҥостор кэм кэллэ…
Елена ПОТОЦКАЯ, «Саха сирэ» хаһыат, edersaas.ru