Соторутааҕыта Тыа хаһаайыстыбатын академията Арктикатааҕы судаарыстыбаннай агротехнологическай университет аатын сүктэ. Тустаах үөрэх кыһата саҥа таһымҥа таҕыста, үгүс уларыйыылар, саҥа бырайыактар киирдилэр.
Төлөөн үөрэнэр устудьуоннары өйдөөн уонна өйөөн, авто-оскуола аһан эрэллэр үһү диэн истибитим. Ити төһө оруннааҕын Арктикатааҕы судаарыстыбаннай агротехнологическай университет ректорыттан Иван Слепцовтан ыйыталаспыппытыгар маннык хоруйдаата:
— Төлөөн үөрэнэр устудьуоннары босхо авто-оскуолаҕа үөрэтиэххэ диэн этии киллэрбитим. Ол эбэтэр, устудьуон үөрэҕин бүтэрэригэр дипломун сэргэ сибидиэтэлистибэ тутуоҕа. Итинник оскуоланы аһан эрэбит, массыына атыылаһабыт, автодром дуогабардаһабыт. “В” уонна тыраахтар категориятыгар аны күһүҥҥүттэн үөрэтэн саҕалыахпыт, сыыйа эбиэхпитин сөп.
Ону таһынан, оробуочай идэҕэ (уонтан тахса идэттэн талан) үөрэтэбит. Бу барыта сыллааҕы үөрэх төлөбүрүгэр киирэ сылдьар. Холобур, зоотехник идэтигэр төлөөн үөрэммит устудьуон дипломун сэргэ, сыбаарсык идэтин баһылыыр уонна массыына эбэтэр тыраахтар бырабаатын тутар. Тоҕо диэтэххэ, устудьуон төлөөн үөрэнэр, аны, истипиэндьийэ көрүллүбэт. Оробуочай идэ хаһан да хаалбат, бэйэтин хаһаайыстыбатыгар даҕаны туһанар кыахтанар. Онон устудьуоннары биһиэхэ кэлэн барыстаахтык үөрэниҥ диэн ыҥырабыт.
Арктикатааҕы судаарыстыбаннай агротехнологическай университекка уларыйыылар, саҥа сүүрээннэр, үөрэххэ ылыы тула ректор Иван Слепцову кытта интервьюну “Саха сирэ” хаһыат ыам ыйын 14 күнүнээҕи нүөмэригэр ааҕыҥ.
Людмила ПОПОВА, “Саха сирэ” хаһыат, edersaas.ru