Бу күннэргэ Уус Маайа улууһун Петропавловскай нэһилиэгэр саҥа уһуйаан үлэҕэ киириэҕэ.
Улуус баһылыга Александр Антипин саҥа тутуллубут оҕо тэрилтэтигэр сылдьан үлэ хаамыытын билистэ. 90 миэстэлээх икки мэндиэмэннээх таас тутуу Ил Түмэн дьокутаата Сергей Ларионов өйөбүлүнэн ыытыллар. Уһуйаан бастакы атаҕа 2019 сыллаахха муус устарга түһэриллибитэ. Сакаасчыт уонна генеральнай бэдэрэрээччит — «ЛОРП» ПАУо.
Баһылык Александр Антипин оҕо саада үлэҕэ киирэргэ толору бэлэмин бэлиэтээтэ. Уһуйааны Дьокуускайтан кэлбит худуоһунньуктар ойуулаан-мандардаан киэргэттилэр. Хас биирдии хос анал ойуулаах-бичиктээх. Холобур, муусука хоһо араас омук доҕордоһуутун көрдөрөр ис хоһоонноох муусука бэлиэлэрдээх. Хас биирдии бөлөххө интерактивнай дуоскалаах. Сотору кэминэн Петропавловскай уһуйаана нэһилиэк кырачааннарыгар аанын тэлэччи аһыаҕа.
Елена ПОТОЦКАЯ, «Саха сирэ» хаһыат, edersaas.ru