Өрөспүүбүлүкэҕэ «Доруобуйа харыстабыла» национальнай бырайыак чэрчитинэн амбулаториялар, биэссэр-акушер пууннара тутуллаллар. Маныаха, бастатан туран, кыһалҕалаах нэһилиэктэр болҕомтоҕо ылыллыбыттара.
Бу туһунан СӨ Доруобуйа харыстабылын миниистирэ Елена Борисова бэлиэтиир.
Ол эбэтэр, нэһилиэк дьоно-сэргэтэ оройуон киинигэр киирэн эбэтэр аттынааҕы бөһүөлэккэ баран доруобуйатын көрдөрөр, бэрэбиэркэлэтэр сирдэригэр болҕомто туһаайыллыбыт. Быйыл сыл бүтүөр диэри 18 тутуу былааннаммытыттан, Эдьигээн, Үөһээ Бүлүү, Томпо, Усуйаана, Орто Халыма, Өлүөхүмэ, Сунтаар, Таатта нэһилиэктэригэр биэссэр-акушер пууннара (ФАП), амбулаториялар аһыллан, номнуо тигинэччи үлэлии тураллар. Оттон Хаҥаласка, Ньурбаҕа, Булуҥҥа, Чурапчыга, Уус Алдаҥҥа, Аммаҕа, Бүлүүгэ, Мэҥэ Хаҥаласка, Намҥа уонна Кырдьаҕас Табаҕаҕа (Дьокуускай) тутуулар быйыл түмүктэниэхтээхтэр. Маныаха биэссэр-акушер пууннара миэбэлинэн, мэдиссиинэ тэрилинэн толору хааччыллаллар. Биэссэрдэр хосторо, процедурнайдар, көрөр-истэр кабинеттар баар буолаллар.
Санатан эттэххэ, 2018 сыллаахха үс биэссэр-акушер пууна Томпо, Нам, Таатта нэһилиэктэригэр аһыллыбыт буоллаҕына, былырыын Аллайыаха, Амма, Алдан, Бүлүү, Ленскэй, Уус Алдан, Кэбээйи, Томпо, Мэҥэ Хаҥалас нэһилиэктэригэр саҥа биэссэр-акушер пууннара, амбулаториялар тутуллубуттара диэн тустаах министиэристибэ пресс-киинэ иһитиннэрэр.
+1
+1
+1
+1
+1
+1
+1