Дьокуускайга А.Е.Кулаковскай аатынан норуоттар доҕордоһууларын дьиэтигэр, тохсунньу 18 күнүгэр, «Интернациональнай саҥа дьыл» диэн далааһыннаах тэрээһин ыытыллар. Бырайыак национальнай-култуурунай түмсүүлэр саамай көхтөөх бэрэстэбиитэллэрин, бэстибээллэр кыттыылаахтарын, ыҥырыылаах ыалдьыттары бука барыларын бырааһынньыктааҕы түһүлгэтигэр түмүө диэн пресс-сулууспаттан иһитиннэрдилэр.
Бэлиэтээбиттэринэн, үөрүүлээх тэрээһин өрөспүүбүлүкэҕэ Сомоҕолоһуу уонна СӨ норуоттарын Ассамблеята тэриллибитэ 25 сылын чэрчитинэн ыытыллар. Бырааһынньык өрөгөйдөөх чааһыгар 2018 сылга ыытыллыбыт үлэлэр түмүктэрин билиһиннэриэхтэрэ, нациялар икки ардыларыгар сыһыаннаһыыларга анаммыт бастыҥ бырайыактар бэлиэтэниэхтэрэ. Ону сэргэ, этнопати уонна национальнай-култуурунай түмсүүлэр бэлэмнээн аҕалбыт бурдук астарынан «Норуоттар килиэптэрэ» быыстапка үөрүүлээх быһыыга-майгыга ыытыллыа диэн этэллэр.
Санатар буоллахха, Норуоттар доҕордоһууларын дьиэтигэр 2018 сылга «Диалог народов – диалог культур» эрэгийиэннэр икки ардыларынааҕы этнофорум, «Күн табата» этническэй мода бэстибээлэ, «Свадебные обряды народов Якутии», «Народы России: праздники, традиции, обычаи» нациялар икки ардыларынааҕы сэһэргэһии, кэпсэтии уруоктара, Саха сирин норуоттарын Ассамблеята Мэҥэ Хаҥалас, Өлүөхүмэ, Уус Маайа, Хаҥалас, Нам улуустарыгар үрдүк тэрээһиннээхтик ыытыллыбыттара. Саха сирин киэҥ нэлэмэн сиринэн тайаан сытар улуустар дьоннорун-сэргэлэрин, чаҕылхай талааннаахтарын, дьоҕурдаахтарын үлэлэрин көрдөрөр куонкурустар, быыстапкалар, бырайыактар, «БлагоТворить: Всем миром» халаантан эмсэҕэлээбиттэргэ көмөлөһөр сыаллаах-соруктаах норуот бырайыага, суруйааччы Чингиз Айтматов төрөөбүтэ 90 сылыгар тэрээһин чэрчитинэн кыргыз киинэтин норуоттар икки ардыларынааҕы I бэстибээлэ бар дьон болҕомтотун тардыбыттара.
—2018 сылга тэрийбит, иилээн-саҕалаан ыыппыт үлэлэрбитин ырытан, сыаналаан көрөн баран, дьоһун ситиһиилэрдээхпититтэн сылбытын киэн туттан туран атаардыбыт. Ол курдук, бырайыактарбыт «Россия — этнический комфорт» национальнай-култуурунай уонна Бүтүн Арассыыйатааҕы IX национальнай-култуурунай «От чистого истока» бырайыактар Бүтүн Арассыыйатааҕы куонкурустарын кыайыылаахтарынан буолбуттара элбэҕи этэр. Норуоттар доҕордоһууларын дьиэтин информация-маркетинг отделын икки бырайыага кыайыылааҕынан тахсан үрдүк наҕараадалары ылары ситиспитэ. «Россия — этнический комфорт» национальнай-култуурунай бырайыак Бүтүн Арассыыйатааҕы куонкуруһугар «Көс Дьон» бырайыакпытыгар I истиэпэннээх лауреат үрдүк аата туттарыллыбыта. Саха сирин уран тарбахтаах маастардарын бырааһынньыктааҕы хаамыыларын туһунан сюжеппыт «От чистого истока» Бүтүн Арассыыйатааҕы IX-с бэстибээлгэ II-с истиэпэннээх лауреатынан буолбута. Нациялар икки ардыларынааҕы бырайыакпыт биир саамай киэҥ далааһыннаах тэрээһиммитинэн буолан туран, СӨ Сомоҕолоһуу сылыгар, Сахабыт сирин бары норуоттарын түмэр үлэтигэр саҥа үүммүт сылга саҕалааһынынан биллэриллэр, — диэтилэр А.Е.Кулаковскай аатынан норуоттар доҕордоһууларын дьиэтин иллээх, үлэһит кэлэктиибэ.
Биһиги корр., «Саха сирэ» хаһыат, edersaas.ru
Хаартыскалар: интэриниэт, А.Е.Кулаковскай аатынан норуоттар доҕордоһууларын дьиэтин пресс-сулууспатын архыыба, Айталина Аргунова түһэриилэрэ
