Арассыыйаҕа 16 саастарын туола илик оҕолору уопсастыбаннай тырааныспартан үүрэн таһаарары бобор саҥа сокуон таҕыста. Кулун тутар 7 күнүттэн сокуон үлэлээн барда.
Бытарҕан тымныы да буоллун, киэһэ хойут да буоллун, оптуобус суоппардара, кондуктордара “бырайыаскын төлөөбөтүҥ” диэн оҕону үүрэн таһаарбыт түбэлтэлэрэ тахсаллар. Хомойуох иһин, Дьокуускайга да маннык түбэлтэлэр буолбуттара.
Алена Атласова, Ил Түмэн дьиэ кэргэҥҥэ, оҕо аймах дьыалаларыгар кэмитиэтин бэрэссэдээтэлэ:
— Олус тымныы кыһыннаах дойдуга олорор дьоҥҥо, биһиэхэ, бу сокуон олус туһалаах дии саныыбын. Оҕолор оскуолаҕа баралларыгар оптуобуһунан бэйэлэрэ эрэ айанныырга күһэллэллэр. Оҕо диэн оҕо, харчытын, эбэтэр каартатын сүтэриэн, туттан кэбиһиэн сөп. Оптуобустан үүрэн таһаарбыттарыгар, эбэтэр бүтэһик тохтобулга илдьэн таһааран кэбиспиттэригэр, оҕолор муммут, тоҥмут-хаппыт түбэлтэлэрэ тахсыбыттара. Онон бу сокуон оҕолорбут олохторугар куттал суох буоларыгар, доруобуйаларын харыстыырга туһуламмыт.
Кэмитиэт үлэтин саҕалыаҕыттан, 2018 сылтан бу боппуруоска үлэлэһэн кэллибит. 2019 сыллаахха “төгүрүк остуолу” тэрийэн, ол түмүгүнэн бэйэни салайыныы уорганнарыгар суруктары ыыппыппыт. Сурук ис хоһооно элбэх оҕолоох ыаллар оҕолорун үөрэх кэмигэр уопсастыбаннай тырааныспарга босхо тиэйэр-таһар туһунан этэ. Ааспыт сыл алтынньытыгар Дьокуускай куорат салалтатын кытары үлэлэһэн, оптуобустар суоппардарыгар аналлаах быраабылаҕа уларыйыыны киллэртэрбиппит. Ол быраабылаҕа улахан киһитэ суох сылдьар, харчыта суох оҕону оптуобустан үүрэн таһаарыы бобуллубута. Ону тэҥэ, оптуобус иһигэр боломуочуйалах уорганнар төлөпүөннэрин ыйыыр туһунан ирдэбил киирбитэ.
Кэнники сылларга “Биир ньыгыл Арассыыйа” баартыйа көҕүлээһининэн, кэккэ эрэгийиэннэргэ маннык курдук сокуоннар ылыллыбыттара. Онон болҕомто тардыллан, бу боппуруос федеральнай таһымҥа быһаарылынна. Билигин сокуон ылыллан, маннык түбэлтэлэр тахсыахтара суоҕа диэн бигэ эрэл баар.
Ангелина Васильева, «Саха сирэ» хаһыат,
Хаартыска: iltymen.ru