Саҥа салайааччылар ананнылар.
Бүгүн өрөспүүбүлүкэ Ил Дархана Айсен Николаев дьиҥ таһымнаах каналыгар саҥа салайааччылар анаммыттарын туһунан иһитиннэрдэ.
Александр Трофимов – Ис бэлиитикэ департаменын салайааччыта
Ол курдук, Александр Семенович Трофимов Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын Дьаһалтатын Ис бэлиитикэҕэ департаменын салайааччытынан ананна.
Александр Семенович Дьокуускайтан төрүттээх, үрдүк үөрэхтээх. 2004 сыллаахха Ураллааҕы судаарыстыбаннай тэхиньиичэскэй университеты, 2010 с. – Уһук Илиҥҥи судаарыстыбаннай сулууспа академиятын бүтэрбит. Кини СӨ Дьиэ-уот хомунаалынай хаһаайыстыбатын министиэристибэтигэр, Абый оройуонун уонна Дьокуускай к. ОДьКХ тиһигэр үлэлээбит. Салгыы Саха Өрөспүүбүлүкэтин Экэниэмикэ министиэристибэтигэр уонна СӨ Архитектура уонна тутуу комплексын министиэристибэтигэр, СӨ Ил Дарханын уонна СӨ Бырабыыталыстыбатын Дьаһалтатыгар үлэлээбит.
2018-2020 сылларга – Кылаабынай Федеральнай иниспиэктэр Саха Өрөспүүбүлүкэтигэр Аппаратыгар. 2020 сылтан Нерюнгри оройуонун баһылыгын солбуйааччыта.
Иван Попов – Олохтоох салайыныы департаменын салайааччыта
Иван Романович Попов Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын Дьаһалтатын Олохтоох салайыныы боппуруостарыгар департаменын салайааччытынан ананна.
Иван Романович эмиэ Дьокуускайтан төрүттээх, үрдүк үөрэхтээх. 2000 сыллаахха Саха судаарыстыбаннай университетын үөрэнэн бүтэрбит. Хатырык орто оскуолатыгар, 1 №-дээх Нам орто оскуолатыгар физика учууталынан, эбии үөрэхтээһин педагогунан үлэлээбит. М.К.Аммосов аатынан Хатырык орто оскуолатыгар дириэктэрдээбитэ. 2011-2013 сылларга – Нам улууһун баһылыгын социальнай боппуруостарга солбуйааччыта. 2013 сылтан “Нам улууһа” МТ улуустааҕы сэбиэтин бэрэссэдээтэлинэн үлэлээн, салайар үлэҕэ улахан уопуттаммыта.
Бэлэмнээтэ Женни Стрюкова
Сүрүн хаартыска: news.ykt.ru ылылынна