СӨ Тыатын хаһаайыстыбатын министиэристибэтин иһинэн үлэлиир «Агростартап» бырагыраама саҕалааччы пиэрмэрдэргэ күүс-көмө буолар.
Граны ылар киһи маннык усулуобуйалары толоруохтаах:
— саҕалааччы пиэрмэр көмө харчыны ылар сиригэр сурутуулаах (пропискалаах) буолуохтаах;
— биисинэһин саҕалыыр сууматыттан 10%-на бэйэтигэр баар буолуохтаах;
— биир эбэтэр онтон элбэх киһиэхэ үлэ миэстэтин арыйыахтаах;
— биисинэс-былаанын суруйан эрдэ министиэристибэҕэ түһэрэр;
— биисинэс-былаанын көмүскүүр.
Пиэрмэр биисинэһин сууматын 10 %-на суох буоллаҕына, Россельхозбаантан кирэдьиит ылыан сөп. Оттон “Агростартап” куонкурус кыттааччыта номнуо атын кирэдьииттээх буоллаҕына, ол туһунан хайаан да биисинэс-былааныгар суруйуон наада. Кирэдьиит граны ылыыга мэһэй буолбатах. Оттон судаарыстыбаҕа, нолуогар 10 тыһыынчаттан үөһэ иэстээх буоллаҕына, грант бэриллибэт.
Куонкуруска Хатас уонна Тулагы олохтоохторо хапсыбаттар. Тоҕо диэтэр бу нэһилиэнньэлээх пууннар Дьокуускай куоракка киирсэллэр. Бырагыраама тыа сирин олохтоохторугар туһуланар. Онон куорат киһитэ биисинэһин ханна саҕалыахтаах сиригэр, улууһугар сурутуон сөп. Оччоҕо граҥҥа кыттар кыахтанар.
Виктория Бястинова, edersaas.ru саайт, «Саха сирэ» хаһыат.
Хаартыска apkrb.info