Ыччаттарга уонна үөрэнээччилэргэ анаан М.К.Аммосов аатынан Хотугулуу-Илиҥҥи федеральнай университет «Саха өйүн-санаатын баайын уонна култууратын сырдатар, чинчийэр киин» кэммиэрчэскэйэ суох автономнай тэрилтэ сэминээр тэрийэр.
Алтынньы 17 күнүгэр zoom.us былаһааккаҕа ыытыллар сэминээр «Норуот өйүн-санаатын барҕа баайын, култууратын саҥа технологияларынан сырдатыы, тиэрдии» диэн ааттаах. Тэрийээччилэр быһаарбыттарынан, аныгы ньымалары, көрүҥнэри туһанан төрөөбүт тылбытын, үгэспитин, сиэрбитин-туоммутун, төрүт дьарыкпытын хайдах гынан үйэтитиэххэ, кэнчээригэ тиэрдиэххэ сөбүн туһунан үөрүйэҕи үллэстэллэр, үөрэҕи ыыталлар.
Өрөспүүбүлүкэҕэ бу эйгэлэргэ үлэлии сылдьар IT-исписэлиистэр кэккэ туһаайыылары, сүбэлэри биэрэллэр. Бу IT эйгэтигэр үлэлиир ыччакка, устудьуоннарга, оскуола үөрэнээччилэригэр, чинчийээччилэргэ, уһуйааччыларга, кыраайы үөрэтээччилэргэ тоҕоостоох буолуоҕа диэн этэллэр.
Итиэннэ истээччи уонна спикер быһыытынан кыттыан баҕалаахтар сайаапкаларын ostyoryja.2019@mail.ru алтынньы 1 күнүгэр диэри ыыталларыгар көрдөһөллөр. Кыттыбыттарга туоһу сурук бэриллэр. Сиһилии 89142681196 ньүөмэринэн ыйыталаһыаххытын сөп.