Өрөспүүбүлүкэ премьерэ Андрей Тарасенко өрөспүүбүлүкэ салаа биэдэмэстибэлэрин кытары мунньаҕар быйыл олохтоох өрөмүөн бырагырааматынан 15 оройуоҥҥа уонна Дьокуускай куоракка 38 оскуола өрөмүөннэнэрин туһунан иһитиннэрдэ.
edersaas.ru
«Үөрэх дьыла саҕаланыар диэри өрөмүөн уонна тутуу матырыйаалларын хомуйуу үлэлэрин бүтэриэххэ, ону таһынан оҕолор оскуолаҕа кэлэллэригэр үөрэх хаамыытыгар мэһэй тахсыбатын курдук үлэ хаачыстыбатын бэрэбиэркэлиэххэ наада. Өрөспүүбүлүкэ Ил Дархана Айсен Николаев өрөмүөнү түргэтэтэргэ бэдэрээччиттэри кытары чопчу дьаһаллары ылыыга уонна ыытыллар үлэ хаачыстыбатын хааччыйыыга ураты болҕомтону уурарга сорудахтаата», -– диэтэ Андрей Тарасенко.
Балаҕан ыйыгар диэри Алдан, Амма, Булун, Үөһээ Бүлүү, Бүлүү, Кэбээйи, Мэҥэ Хаҥалас, Муома, Нам, Ньурба, Өймөкөөн, Сунтаар, Томпо, Уус Алдан, Хаҥалас улуустарыгар уонна Дьокуускай куоракка оскуолалары туттарыы былааннанар. Бу эбийиэктэр тутуу өттүнэн бэлэмнэрэ — 82%. Ураты болҕомто Булуҥ улууһун Тиксии 1 №-дээх оскуолатыгар ууруллар, манна тутуу 39% эрэ бэлэм.
Өрөспүүбүлүкэ премьерэ тустаах министиэристибэлэргэ бэдэрээттэһэр тэрилтэни суһаллык уларытарга уонна эбийиэккэ эбии үлэ күүһүн туһанарга сорудахтаата.
Билигин өрөмүөн үлэлэрэ 25 муниципальнай тэриллии уонна уокуруктар 58 эбийиэктэригэр ыытыллаллар. Мантан сороҕун быйыл, онтон хаалбытын 2023 сылга туттарыахтара.
Икки сыллаах бырагыраамаҕа оскуолалары өрөмүөннээһин, миэбэлинэн уонна тэриллэринэн хааччыйыы киирэллэр.
РФ бэрэсидьиэнэ Владимир Путин 2026 сылга диэри оскуолалары олохтоохтук өрөмүөннээһин бырагырааматын бэлэмнииргэ эппитэ. Саха сирин оскуолаларын олохтоохтук өрөмүөннүүргэ 2022-23 сылларга 2 миллиард 889 мөоүйүөн солкуобай бэриллибитэ. Федеральнай субсидиянан 25 муниципальнай тэриллиигэ уонна уокуруктарга 58 оскуола олохтоохтук өрөмүөннэнэрэ былааннаммыта.
Өрөспүүбүлүкэ ону таһынан Арктика оройуоннарын киллэрэн туран, өссө 46 оскуоланы өрөмүөннүүргэ эбии үбү ылбыта.
Барыта эрэгийиэн 104 оскуолата олохтоохтук өрөмүөннэниэҕэ.
Надежда ЕГОРОВА, «Саха сирэ» хаһыат, edersaas.ru
СӨ Ил Дарханын уонна бырабыыталыстыбатын пресс-сулууспатын иһитиннэриитинэн