Саҥа үөрэх дьылыгар киирэр уларыйыылар

Ааптар: 
Бөлөххө киир:

Бэҕэһээҥҥиттэн СӨ үөрэҕин үлэһиттэрин атырдах ыйынааҕы мунньахтара саҕаланна. Кэлэр үөрэх дьылыгар туох саҥа уларыйыылар киириэхтэрэй?

edersaas.ru

РФ үөрэҕин миниистирэ Сергей Кравцов атырдьах ыйынааҕы мунньах иитинэн педагогтарга туһаайыытыгар, балаҕан ыйын 1 күнүттэн учуутал толоруохтаах докумуона аҕыйыаҕын, “Үөрэх туһунан” сокуонтан “үөрэх өҥөтө” диэн өйдөбүл ылыллыбытын, манан учууталга сыһыан төрдүттэн уларыйыан, кылаас салайааччыларыгар, орто анал үөрэх тэрилтэлэр куратордарыгар төлөбүр оннунан хаалыан, кэнэҕэски педагогтары бэлэмнээһиҥҥэ, инфраструктураҕа болҕомто ууруллуон иһитиннэрдэ.

СӨ үөрэҕин уонна билимин миниистирэ Ирина Любимова бэйэтин дакылаатыгар иитии үлэтэ дойду үрдүнэн биир кэлим көрүүнэн барыаҕын эттэ.   “Балаҕан ыйын 1 күнүттэн бары оскуолаларга уонна анал үөрэх тэрилтэлэригэр үөрэх нэдиэлэтэ судаарыстыбаннай былааҕы өрө көтөҕүүттэн уонна “Суолталааҕы кэпсэтии” (“Разговоры о важном”) кылаас чааһын ыытыыттан саҕаланыаҕа. Тиэмэтинэн патриотизм, гражданскай иитии, устуоруйаны сырдатыы, майгы-сигили, экология, о.д.а. буолуо”, — диэн чопчулаата.

Иккиһинэн, балаҕан ыйын 1 күнүттэн өрөспүүбүлүкэ 484 оскуолатыгар “РФ гражданнарын патриотическай тыыҥҥа иитии” федеральнай бырайыак иитинэн иитэр уонна оҕо уопсастыбаннай холбоһуктарын кытта үлэлэһэр дириэктэр сүбэһитэ диэн саҥа дуоһунас баар буоларын иһитиннэрдэ. Биһиги өрөспүүбүлүкэбит маныаха дойду 35 пилотнай эрэгийиэниттэн биирдэстэринэн буолар эбит. Бука, ыччаты быһаччы патриотическай тыыҥҥа иитиинэн дьарыктанар үлэлээх-хамнастаах дуоһунас быһыылаах диэн сэрэйиэххэ сөп.

Иитии үлэтигэр сыһыаннаах өссө кэккэ уларыйыылар бааллар. Ол курдук, оҕолор уонна ыччаттар Арассыыйатааҕы хамсааһыннара тэрийиллиэхтээхтэр. Саҥа хамсааһыҥҥа кэлиҥҥи сылларга ситиһиилээхтик үлэлээбит Юнармия, “Большая перемена”, “Орлята России” бырайыактарга олоҕуруоҕа диэн этэллэр.

Итини сэргэ, оскуолаларга оҕо уопсастыбаннай тэрилтэлэрэ ыытар үлэлэрин көҕүлүүр кииннэр баар буолуохтаахтара. Балары дойду былааҕынан хааччыйыахтара. Тоҕото дьэҥкэтик өйдөнөр.

Аны бу сылтан саҕалаан, 2024 сылга бары үөрэх тэрилтэлэригэр түһүмэҕинэн оскуола түмэллэрэ уонна оскуола тыйаатырдара тэриллиэхтэрэ диэн иһитиннэрдэ. Күн бүгүҥҥэ диэри энтузиастар баҕаларынан оскуола иһигэр биир кыараҕас хоско үлэлии олорбут түмэллэр, дьэ, толору үлэлииһилэр диэн эрэниэххэ сөп. Аныгы ыччат бодоруспат, кэпсэппэт буолла дииллэр. Онон тыйаатыр үлэтэ оҕо саҥарар дьоҕурун сайыннарарга көмөлөөҕө саарбахтаммат.

Маны таһынан, хас биирдии оскуолаҕа, орто анал үөрэх тэрилтэтигэр байыаннай-патриотическай кулууптар, үөрэнээччилэр уонна устудьуоннар успуорка кулууптара баар буолуохтара.

Ил Түмэн билимҥэ, үөрэххэ, култуураҕа, иһитиннэриилэри киэҥник тарҕатар сириэстибэлэргэ уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Феодосия Габышева суруналыыстар ыйытыыларыгар хоруйдууругар: “Үөрэх тэрилтэлэригэр үчүгэй хамсааһын быһыытынан үөрэх кэннэ эбии дьарыктар (продленнай группалар) аһыллар буоллулар. Усулуобуйа баар сиригэр аһыллыахтара диэн суруллар. Биллэн турар, куоракка уустук буолуо. Тоҕо диэтэххэ, Дьокуускай куоракка оскуолалар бары икки симиэнэлээх үлэлии олороллор. Онтон тыа сиригэр бу үтүө хамсааһын быһыытынан барыан сөп. Билигин үбүн-харчытын көрөр ирдэнэр, үгүс тэрээһин үлэтэ эрэйиллэр.

Маны таһынан, иитэр үлэҕэ дириэктэр сүбэһитэ диэн саҥа дуоһунас киирэр. Бу дуоһунас эспэримиэн быһыытынан федеральнай үбүлээһинэн барыахтаах. Көдьүүстээҕэ көһүннэҕинэ оскуолалаларга маассабайдык киириэхтээх. Үөрэххэ саҥа уларытыылар бааллар. Манна барытыгар бэлэмнээх буоларбыт эрэйиллэр”, — диэн чопчулаата.

Людмила ПОПОВА, “Саха сирэ” хаһыат, edersaas.ru

Хаартыска: СӨ Үөрэҕин уонна билимин министиэристибэтин саайтыттан.

+1
0
+1
0
+1
0
+1
0
+1
0
+1
0
+1
0