Сүрүн Үөрэх уонна наука

Саҥа үөрэх дьылыгар бэлэмнэнии түмүктэнэн эрэр

СӨ бырабыыталыстыбатын бэрэссэдээтэлин солбуйааччы Сергей Местников ыыппыт мунньаҕар 2021-2022 үөрэх дьылыгар үөрэх тэрилтэлэрин бэлэмнэниитин боппуруоһун көрдүлэр.

edersaas.ru

Бэрэссэдээтэли солбуйааччы СӨ Ил Дарханын ыйааҕын бырайыага оҥоһуллан бэлэмнэммитин, билиҥҥитэ сөбүлэһиигэ сылдьарын, онно үөрэх тэрилтэлэригэр үөрэх хаамыытын тэрийиигэ улуустарга, үөрэх тэрилтэлэригэр сүбэлэр ыйыллыбыттарын бэлиэтээтэ.

Биэдэмистибэлэр икки ардыларынааҕы хамыыһыйа былаан быһыытынан эбийиэктэри көрүүтэ, тутуута (прием) ыам ыйын 31 күнүттэн саҕаламмыта итиэннэ атырдьах ыйын 20 күнүгэр түмүктэниэхтээҕэ. Атырдьах ыйын 18 күнүнээҕи туругунан, хамыыһыйа, уопсайа, 1 187 (87%) үөрэх эбийиэгин үлэҕэ туппут: 578 оскуоланы (90%), 497 оскуола иннинээҕи тэрилтэни (91%), 165 эбии үөрэхтээһин тэрилтэтэтин (91%).

Үлэни туттарыы кыраапыгыттан хаалыы ордук Бүлүү (2 эбийиэк), Кэбээйи (22 эбийиэк), Чурапчы (3 эбийиэк) улуустарыгар уонна Дьокуускай куоракка (12 эбийиэк) бэлиэтэнэр.

Үөрэх дьылын саҕаланыыта үс эбийиэги – Хаҥалас улууһун Өктөм сэлиэнньэтигэр “Үөрэх” национальнай бырайыагынан 220/100 миэстэлээх оскуола-уһуйааны, Дьокуускай куоракка 360 миэстэлээх оскуоланы, 85 миэстэлээх уһуйааны арыйыахтара.

Балаҕан ыйын 1 күнүгэр 148,5 тыһыынча оскуола үөрэнээччитигэр, ол иһигэр 16 тыһыынча 1 кылааска киирэр оҕоҕо саҥа үөрэх дьыла олоҕурбут көрүҥүнэн (очно) саҕаланыаҕа. Өрөспүүбүлүкэ бары үөрэҕин тэрилтэлэрин Роспотребнадзор ирдэбилинэн харыстанар сириэстибэнэн хааччыйбыттар. Бары санитарнай-эпидемиологическай ирдэбили тутуһан үлэлиэхтэрэ. Интэринээттэр олоҕурбут көрүҥүнэн үлэлиэхтэрэ. Интэринээккэ киирэн баран оҕолор 14 күн устата дьиэҕэ олоруу (самоизоляция) эрэсиимин тутуһуохтара.

Өскөтүн улууска хааччахтааһын миэрэлэрэ эбэтэр ыксаллаах түгэннэр буоллахтарына, үөрэҕи дистанционнай технологияны туһанан ыытыахтара.

Билии күнүн тэрээһинэ, төрөппүттэргэ дьаҥы утары миэрэлэри тутуһуннаран туспа миэстэни көрөн, бары кылаастарга кыраапык быһыытынан барыаҕа. Хааччахтааһын киирэр түгэнигэр тэрээһини дистанционнай технологияны туһанан ыытыахтара.

Педагогтарга уонна үөрэх тэрилтэлэрин атын үлэһиттэригэр быһыыны биэрии салҕанар. Атырдьах ыйын 18 күнүнээҕи туругунан, үөрэх эйгэтин үлэһиттэрин 74,41 %  быһыыны ылбыттар. Саамай элбэх — Муома улууһугар (93,61%), саамай аҕыйах — Хаҥалас улууһугар (63,14%).

Бэрэссэдээтэли солбуйааччы Сергей Местников атырдьах ыйын 25 күнүгэр диэри үөрэх эбийиэктэрин 100 бырыһыан бэлэм оҥорор ирдэнэрин эттэ уонна СӨ Үөрэҕин уонна наукатын министиэристибэтэ атырдьах ыйын 25 күнүгэр улуустары кытта видеонан мунньаҕы ыытарыгар сорудахтаата.

СӨ Ил Дарханын уонна СӨ Бырабыыталыстыбатын пресс-сулууспата.

 

 

0
0