«Биир ньыгыл Арассыыйа» баартыйа эрэгийиэннээҕи кэмитиэтигэр «Саҥа оскуола» баартыйа бырайыагынан мунньах буолла.
Сүбэ мунньахха «Биир ньыгыл Арассыыйа» баартыйа «Саҥа оскуола» бырайыагын олохтоох сүрүннээччитэ, Ил Түмэн наукаҕа, үөрэххэ, култуураҕа, сонуну киэҥник тарҕатар сириэстибэлэргэ уонна уопсастыбаннай тэрилтэлэр дьыалаларыгар сис кэмитиэт бэрэссэдээтэлэ Феодосия Габышева, педагогическай састаап, Дьокуускай куорат 1 №-дээх оскуолатын төрөппүттэрин кэмитиэтин бэрэстэбиитэллэрэ кытыннылар.
Сүбэ мунньахха «Биир ньыгыл Арассыыйа» баартыйа Саха сиринээҕи салаатын кэмитиэтин салайааччытын э.т. Руслан Платонов «Саҥа оскуола» баартыйа бырайыагын биир саҥа хайысхатын бэлиэтээтэ. «Баартыйа олохтоох бары салаатын кытыннаран туран, үөрэх эйгэтин үлэһиттэрин уонна төрөппүттэр уопсастыбаннай сэбиэттэрин тэрийэр булгуччу наада. Сүрүн сыалынан өрөспүүбүлүкэ оскуолаларын бастыҥ быраактыкаларын үөрүйэхтэрин атастаһыы буолуоҕа. Ону тэҥэ интэриниэт сабыдыалынан киирэ турар Арҕаа сайдыылаах дойдулар араас «кирдээх» өйдөрө-санаалара, мөкү кубулҕаттара өрөспүүбүлүкэ оҕолорун, үүнэр көлүөнэ өйүн-санаатын буорту гынар кутталлаахтар. Ол эбэтэр, колумбайнердар, буллинг үөтэтэ суох көстүүлэрэ билиҥҥи кэмҥэ олус кутталы үөскэтэллэр. Ону утары күүстээх үлэ барыан наада«, — диэн этэр Руслан Платонов.
Сүбэ мунньах кыттыылаахтара үлэ хайысхаларын дьүүллэстилэр. Онуоха маннык хайысханан көрсүһүүлэр ый ахсын куйаар ситиминэн итиэннэ сирэй көрсөн олорон кэпсэтиинэн ыытыллыахтара.