Саҥа мэхэньиисим тыа сирин олохтоохторун дохуота элбииригэр көмөлөстө

Бөлөххө киир:

Былырыын тыа хаһаайыстыбатын сайыннарыыга саҥа мэхэньиисим олоххо киирбитэ. Тыа сиригэр олорор  дьон эбии дохуоту аахсалларыгар улахан көдьүүстээх буолла. Ол курдук, былырыын ыанар ынах аайы 35-тии тыһ солк.  бэриллибитэ уонна  астыыр тэрилтэлэр үүтү соҕотуопкалыылларыгар субсидия көрүллүбүтэ.

Тыа хаһаайыстыбатын өйүүр саҥа мэхэньиисим 2021 сыллааҕы түмүгүн уонна быйылгы былааны кытта Ил Дархан Айсен Николаев  билистэ. «Тыа хаһаайыстыбатын өйүүр саҥа мэхэньиисим  тыа сирин олохтоохторун дохуоттара үрдүүрүгэр улахан көмөнү оҥордо. Былырыын элбэх ойуур баһаардардаах  кэмҥэ уонна кураан  сайын буолан, от үүммэтэҕин үрдүнэн, эрдэ сөптөөх көмө оҥоһуллубутун түмүгэр,  ынах ахсаанын аччаппатыбыт,  өссө эбиллэн биэрдэ», — диэн Айсен Сергеевич быһаарар.

Ааспыт сылга ыанар ынах аайы 35-тии тыһ. солк көмөнү барыта  кэтэх хаһаайыстыбалаах 9715 киһи ылбыта. Статистика көрдөрүүтүнэн  2022 сыл саҥатыгар  хороҕор муостаах 2403  ынаҕынан элбээбит. Саҥа мэхэньиисим көмөтүнэн  астыыр-үөллүүр тэрилтэлэр биир лиитэрэ үүтү атыылаһалларыгар 60 солк. көрүллэрэ ситиһилиннэ. Бу миэрэ көмөтүнэн  үүтү соҕотуопкалааһын 5,8 % үрдээбит. Ону тэҥэ,  астыыр-үөллүүр тэрилтэлэр бэйэлэрин үптэринэн 3 тыһ. туонна кэриҥэ үүтү чааһынай дьонтон атыыластылар.

«Бу — нэһилиэнньэ уонна тэриллиилээх хаһаайыстыбалар  үүт  соҕотуопкатын кээмэйин үрдэтиигэ интэриэстээхтэрин көрдөрөр. Быйыл биһиги  тустаах өйөбүл систиэмэтин өссө тупсаран биэриэхпит», — диэн тыа хаһаайыстыбатын миниистирэ  Александр Атласов быһааран биэрдэ.  Быйыл  эти, хортуоппуйу, оҕуруот аһын уонна туорахтаах култуураны соҕотуопкалааһыҥҥа  көрүллэр субсидияны үрдэтии иккис түһүмэҕэ саҕаланар. Маны олоххо киллэриигэ 214 мөл солк. кэриҥэ көрүллүбүт.

Санатар буоллахха, ааспыт сылга  тыа хаһаайыстыбатын сайыннарыыга аналлаах саҥа мэхэньиисими олоххо киллэриигэ 2020 сыллааҕар 1,3 млрд солк. элбэх үп көрүллүбүтэ. Оттон быйыл  тыа хаһаайыстыбатын сайыннарыыга барыта 12,5 млрд солк. тыырылынна, бу — өтөрүнэн көрүллүбэтэх элбэх үп буолар.

+1
0
+1
0
+1
0
+1
0
+1
0
+1
0
+1
0