“Эдэр профессионаллар” (WorldSkills Russia) VII национальнай чөмпүйэнээт сүүмэрдиир күрэхтэһиитэ түмүктэннэ. Ый аҥаарын устата Арассыыйа 64 эрэгийиэниттэн эспиэрдэри кытта холбоон 560 киһи кэлэн 11 компетенцияҕа күрэхтэһэн, үлэлээн барда.
edersaas.ru
“Мобильнай сыһыарыыны оҥоруу” (“Разработка мобильного приложения”) компетенция быйыл саҥа сүрэхтэннэ. Урукку сылларга суоҕа. Улахаттарга (22 саастарыгар диэри) алта, оскуола үөрэнээччилэригэр (14-16 саастаахтарга) түөрт киһи күөн көрүстэ. Ол курдук, кыттааччылар Москваттан, Москва уобалаһыттан, Саха сириттэн, Новосибирскайтан, Томскайтан, Владивостоктан, Екатеринбуртан кытыннылар. Кылаабынай эспиэр Сергей Климович: “Бу компетенцияҕа туспа исписэлиистэри бэлэмнээбэттэр. Кэллиэстэргэ, үрдүк үөрэх кыһаларыгар хайа эрэ модулларын туһаналлар. Мобильнай платформаҕа (чаһыга, төлөпүөҥҥэ, планшекка, тэлэбиисэргэ) анаан хомуллубут компетенция буолар”, — диэн иһитиннэрдэ.
Манна даҕатан эттэххэ, Дьокуускайга былырыын 6 компетенцияҕа сүүмэрдиир күрэхтэһии ыытыллыбыта. Быйыл 11 компетенцияҕа буолла. Исписэлиистэр бэлиэтииллэринэн, атын эрэгийиэннэргэ иһэ үллүбүтэ үс-түөрт компетенцияҕа сүүмэрдээһини тэрийэллэр эбит. Төрүөтэ тугуй диэн ыйытыыга, СӨ Үөрэҕин уонна наукатын министиэристибэтин профессиональнай үөрэхтээһин салаатыгар сүрүннүүр исписэлииһэ Степан Степанов “Эдэр профессионаллар” (WorldSkills Russia) чөмпүйэнээт иитинэн кэлбит күрэхтэһиигэ туһаныллар тэриллэри салгыы олохтоох устудьуоннар күннээҕи үөрэхтэригэр туһаналлар диэн быһаарар. Ол эбэтэр, материальнай-тэхиньиичэскэй баазаны хаҥатарга сүрүн тирэх буолар эбит. Ол түмүгэр, устудьуоннар норуоттар икки ардыларынааҕы ирдэбилгэ эппиэттиир тэрилинэн үөрэнэллэр.
Новосибирскайтан кэлбит тустаах компетенция эспиэрэ Инна Салий иһитиннэрбитинэн, араас элэмиэннэри туһанан кыттааччылар халлаан туругун көрдөрөр мобильнай сыһыарыыны оҥорбуттар. Биир сорудах эрээри, хас даҕаны түһүмэхтэрдээх диэн этэр.
Майатааҕы лиссиэй 10 кылааһын үөрэнээччитэ Марк Соловьев быйыл кыһын Дьокуускайга ыытыллыбыт өрөспүүбүлүкэ иһинээҕи күрэхтэһиигэ кыттан юниордарга бастаан, Арассыыйатааҕы сүүмэрдээһиҥҥэ киирбит. Сынньалаҥнарын кэмигэр көрсөн, аҕыйах ыйытыыга хоруйдууругар көрдөстүм. “Мобильнай сыһыарыы” компетенцияҕа ылсыбыта аҕыйах ый буолбут. “Саҥа саҕалыыр буолан, интэриэһинэй. Биллэн турар, сорудаҕа уустук соҕус”, — диэн санаатын үллэстэр.
Быйылгы сүүмэрдээһиҥҥэ Саха сирин аатын 194 киһи көмүскээтэ. Бастыҥнар ыам ыйын 20-24 күннэригэр Казаҥҥа ыытыллар “Эдэр профессионаллар” (WorldSkills Russia) VII чөмпүйэнээтигэр кыттар бырааптаныахтара. Санатан эттэххэ, аан дойдутааҕы чөмпүйэнээт Арассыыйаҕа аан маҥнайгытын ыытыллар, 60-ча дойдуттан кэлэллэрэ күүтүллэр.
Людмила ПОПОВА, “Саха сирэ” хаһыат, edersaas.ru