Ил Дархан Егор Борисов иллэрээ күн, муус устар 28 күнүгэр информацияны киэҥник тарҕатар өрөспүүбүлүкэтээҕи сириэстибэлэр эрэдээктэрдэрин киэһэ алта чааска ыҥыран ылан, бэйэтин баҕатынан дуоһунаһыттан уурайан эрэрин туһунан иһитиннэрдэ. Саха сирин дьоно ити иһитиннэрииттэн бары да соһуйдубут.
edersaas.ru
Егор Борисов иһитиннэриититтэн. Егор Афанасьевич бу соторутааҕыта кылаабынай эрэдээктэрдэри кытары көрсүһүүтүгэр: “Өскөтүн уурайар түгэннээх да буоллахпына, ону миигиттэн бэйэбиттэн истиэххит”, — диэн эппитэ. Кырдьыгын эттэххэ, сэрэйии баара, ол эрээри бу билигин буолуо диэн санаабытыгар да оҕустарбакка сылдьыбыппыт.
“Тус бэйэм дойдум, дьонум туһа диэн үлэлээн кэллим, норуотум үөрүүтүн-хомолтотун бииргэ үллэһинним. Бар дьоммор үрдүк итэҕэлгит иһин барҕа махталбын тириэрдэбин”, — диэн кини этиитин түмүктээбит. Бу тыллар кэтэхтэригэр тыа хаһаайыстыбатыгар миккиллэ сылдьар эдэр үлэһит, оройуон сэбиэтин дьокутаата, бэрэссэдээтэлэ, Саха сирин тыатын хаһаайыстыбатын миниистирэ, бырабыыталыстыбатын бэрэссэдээтэлин бастакы солбуйааччыта, бэрэссэдээтэлэ, онтон Ил Дархана тураллар. Ону санаан кэбиһиҥ.
Айсен Николаев ананыыта. Егор Борисов үлэтиттэн уурайан эрэрин туһунан иһитиннэрии кэнниттэн, тута Москваттан: “Айсен Николаев Владимир Путин ыйааҕынан Ил Дархан эбээһинэһин толорооччунан ананна”, — диэн сонун тилийэ көппүтэ. Манна бэлиэтээн этиэххэ, Егор Борисов суруналыыстары кытары көрсүһүүтүгэр Ил Дархан эбээһинэһин толорооччунан Саха сириттэн төрүттээх киһи буолуоҕун этэн аһарбыта. Биллэн турар, Айсен Сергеевич РФ бэрэсидьиэнин Владимир Путин үлэлиир хоһугар ыҥырыллан киириэн иннинэ хас да кандидатура көрүллүбүтэ, олортон талыллыбыта чахчы. “Мин кэннибиттэн кэлиэхтээх Ил Дархан хайаатар да Саха сириттэн төрүттээх киһи буолуохтааҕын эппитим. Араас этии киирбититтэн мин тылбын ылыммыттарыттан үөрэбин, көрөргүт курдук, Айсен Николаев Ил Дархан эбээһинэһин толорооччунан ананна. Эдэр, эрчимнээх салайааччы чопчу билигин, саҥа стратегическэй сыал-сорук туруоруллубут кэмигэр, кэлэрэ сөптөөх. Ол өрөспүүбүлүкэҕэ туһалаах буолуоҕа”, — диэн бэлиэтиир кини.
Өйдөөн көрдөххө, ити этиитэ хаһан эрэ Михаил Николаев — Вячеслав Штыровка, Вячеслав Штыров — Егор Борисовка эппит этиилэригэр ханыылыы. Михаил Ефимович – Вячеслав Анатольевиһы, Вячеслав Штыров – Егор Борисовы бэйэлэрин кэннилэриттэн хаалларбыттара. Вячеслав Штыров да, Егор Борисов да оччотооҕуга өрөспүүбүлүкэ олоҕун-дьаһаҕын салайса, сайдыытын торумун тэҥҥэ оҥорсо сылдьаллара. Айсен Николаев судаарыстыбаннай да муниципальнай да былааска (СӨ үбүн миниистиринэн, Бэрэсидьиэн уонна бырабыыталыстыба дьаһалтатын салайааччытынан, бастакы вице-премьеринэн, киин куораппыт баһылыгынан) үлэлээн, хаһаайыстыбаннай үлэҕэ эриллэн, өрөспүүбүлүкэ олоҕун ымпыгын-чымпыгын үчүгэйдик билэр.
Онон өрөспүүбүлүкэбит үрдүкү салалтатыгар утумнааһын баар буолан, биһиги сайдыыбыт биир да түгэҥҥэ тохтообокко баран иһэр. Оннук да буолуох тустаах.
Айсен Николаев муоһаны тутта. Айсен Сергеевич Владимир Путин кэбиниэтиттэн тахсаат, тута өрөспүүбүлүкэ салайааччытын быһыытынан үлэлээбитинэн барда. Москваҕа Саха сирин бэрэстэбиитэлистибэтигэр “АЛРОСА” АХ салайааччытын Сергей Иванову, “Якутия” технопаарка дириэктэрин Анатолий Семеновы, улуус баһылыктарын кытары көрүстэ, РФ бырабыыталыстыбатыгар сырытта. Үлэтигэр сыһыаран, бастатан туран, халаан уутуттан эмсэҕэлээбиттэргэ көмөнү туһаайыаҕын, нэһилиэнньэлээх пууннары чөллөрүгэр түһэриигэ үлэлэһиэҕин эттэ. Бүгүн Саха сиригэр көтөн кэлэн Егор Борисовы, СӨ бырабыыталыстыбатын чилиэннэрин кытта көрсүөҕэ.
Ил Дархан быыбара хаһан буолуоҕай? Бу туһунан Егор Борисов: “Саха сирин салайааччытын талыы быйыл буолуохтаах Ил Түмэн быыбарын кытары ыытар сөптөөх дии саныыбын. Сылын аайы быыбардары ыытар үп-харчы да, күүс-сэниэ да өттүнэн ыарахан”, — диэн санаатын үллэһиннэ. Санатан эттэххэ, Ил Түмэн быыбара балаҕан ыйыгар буолуохтаах. Оччотугар бу күһүн өрөспүүбүлүкэ таһымыгар Ил Дархан, Ил Түмэн быыбардара буолуохтара, ону таһынан сорох улуустар баһылыктара, дьокутааттара талыллыахтара.
Егор Борисов тугунан дьарыктаныаҕай? Егор Борисов иллэрээ күн киэһэ бырабыыталыстыба чилиэннэрин, бэҕэһээ өрөспүүбүлүкэ судаарыстыбаннай улахан хампаанньаларын, тэрилтэлэрин салайааччыларын кытары көрүстэ. Уонна тэҥҥэ үлэлэспиттэригэр махталын биллэрэн туран, атын регионнарга холоотоххо, Саха сирин салайааччылара, исписэлиистэрэ ураты көрүүлээхтэринэн, үрдүк таһымнаахтарынан уратылаахтарын бэлиэтээтэ уонна салгыы да Саха сирин туһугар кыахтарын, кыһамньыларын, уопуттарын, үөрэхтэрин ууран үлэлииллэригэр эттэ.
Салгыы тугу үлэлиэҕин туһунан этэригэр: “Билигин доруобуйабын көрүнүөҕүм. Ый кэриҥэ сынньаныам. Дойдум, дьонум туһугар үлэлиирбин-хамсыырбын уураппаппын. Билигин үгүс сиргэ үлэҕэ ыҥыраллар. Федеральнай киинтэн эмиэ этии киирдэ”, — диэн бэлиэтээтэ.
Аграфена КУЗЬМИНА, «Саха сирэ» хаһыат
Мария ВАСИЛЬЕВА хаартыскаҕа түһэриилэрэ.